Drejtuesit e BE-së, gjatë një video-konference kushtuar reagimit evropian ndaj epidemisë së koronavirusit, ranë dakord për një qasje të koordinuar për të kufizuar përhapjen e mëtejshme, furnizimin me pajisje mjekësore dhe adresimin e pasojave socio-ekonomike të epidemisë.
U njoftuan konsultat ditore të ministrave të Shëndetësisë dhe Punëve të Brendshme të BE-së, si dhe formimi i një fondi të investimeve në vlerë prej 25 miliardë euro.
Presidenti i Këshillit Evropian Charles Michel tha se katër përparësi janë përcaktuar kur bëhet fjalë për përgjigjen e BE-së ndaj epidemisë së virusit COVID-19.
“Në radhë të parë është kufizimi i përhapjes së virusit, marrja e masave proporcionale në përputhje me faktet shkencore dhe mjekësore, koordinimi i shpërndarjes së pajisjeve mjekësore për funksionimin e rregullt të tregut të brendshëm, si dhe promovimi i hulumtimeve në fushën e zhvillimit të vaksinave, diagnozës dhe trajtimit të pacientëve COVID-19,” deklaroi Michel.
Presidentja e Komisionit Evropian Ursula von der Leyen tha se gjëja më e rëndësishme në këtë pikë ishte ndalimi i përhapjes së shpejtë të virusit.
“Gjëja më e rëndësishme është që ta ngadalësojmë atë sa më shumë që të jetë e mundur, sepse nëse ka shumë të infektuar brenda një kohe të shkurtër, do të ketë një presion të madh në sistemin shëndetësor”, tha ajo.
BE shton se 120 milion euro tashmë janë investuar në fushën e hulumtimit të vaksinave ndaj viruseve.
Lidhur me pasojat socio-ekonomike të epidemisë, Brukseli thotë se ata janë të gatshëm të përdorin të gjitha instrumentet dhe fondet e nevojshme për të ndihmuar firmat dhe punëtorët e prekur dhe për të ruajtur parametrat pozitivë ekonomikë.
“Përveç ndihmës shtetërore dhe financimit nga Pakti i Stabilitetit dhe Zhvillimit, BE gjithashtu do të krijojë një fond investimi prej 25 miliardë eurosh për të mbështetur sistemet shëndetësore, bizneset, tregun e punës dhe pjesë të tjera të ndjeshme të ekonomisë”, tha Von der Leyen.
Ajo shtoi se KE do të koordinojë çdo ditë me ministrat Shëndetësisë dhe Punët e Brendshme të BE-së, në mënyrë që të dijë “kush, çfarë dhe si funksionon dhe si mund të koordinohen të gjitha masat, të përshtatshme dhe me kohë”.
BE deklaron se nuk ka njoftime në këtë kohë për të mbyllur kufijtë e brendshëm. /tesheshi.com/
