Bashkimi Evropian ka kërcënuar se do të vendosë masa ndëshkuese ndaj Serbisë dhe Kosovës nëse ato nuk parandalojnë përsëritjen e dhunës që u drejtua kundër paqeruajtësve ndërkombëtarë pas zgjedhjeve të diskutueshme për kryetarë komunash.
“Dështimi për të ulur tensionet do të çojë në pasoja negative,” tha BE në një deklaratë.
Njoftimi bën thirrje për vendosjen urgjente të paqes në veri të Kosovës, ku në fund të majit demonstruesit serbë sulmuan paqeruajtësit e NATO-s me mjete ndezëse dhe gurë gjatë një proteste në fshatin Zveçan. Si pasojë u plagosën 30 ushtarë italianë dhe hungarezë.
Se si mund të dukeshin saktësisht “masat vendimtare” të kërcënuara nuk u shpjegua. Është e mundur të reduktohet mbështetja financiare që marrin dy vendet si kandidate për anëtarësim në BE. Mund të kufizohet edhe bashkëpunimi.
Thirrje për de-përshkallëzimin
“Dhuna mund të ishte shmangur dhe duhet shmangur në të ardhmen”, thuhet në një deklaratë të lëshuar në emër të BE-së nga Komisioneri i Punëve të Jashtme Josep Borrell.
BE-ja i bëri thirrje Kosovës dhe Serbisë që të ndërmarrin veprime të menjëhershme dhe të pakushtëzuara për të de-përshkallëzuar situatën dhe të “ndalojnë përdorimin e retorikës së mosmarrëveshjes dhe të përmbahen nga çdo veprim i mëtejshëm i pakoordinuar”.
Protestat e fundit u ndezën pas zgjedhjes së kryetarëve të rinj në veri të Kosovës, politikanë shqiptarë që fituan zgjedhjet e pjesshme, të cilat u bojkotuan nga serbët me urdhër të autoriteteve në Beograd.
Qëndrimi nga Brukseli barazon serbët e shqiptarët, strukturat kriminale të veriut me qeverisjen në Prishtinë.
Sipas kësaj të fundit, pas dhunës serbe janë segmentet e krimit në veri, të nxitura nga Beogradi. /tesheshi.com/
