Bashkimi Evropian paralajmëroi për të ashtuquajturën “flotë hije” të Rusisë dhe premtoi të marrë masa më të forta pas sabotimit të supozuar të një kablli energjetik nënujor pranë brigjeve të Finlandës.
BE do “të ndërmarrë hapa më të fortë për t’iu kundërvënë rreziqeve që paraqesin këto anije,” tha shefja e politikës së jashtme Kaja Kallas për gazetën Die Ëelt në një intervistë të botuar të hënën.
Kablloja e dëmtuar
“‘Flota në hije’ ruse kërcënon mjedisin dhe financon buxhetin e luftës ruse”, tha Kallas, duke shtuar se anijet dyshoheshin se kryenin akte sabotimi.
Kablloja elektrike nënujore Estlink 2 midis Estonisë dhe Finlandës u ndërpre të mërkurën në atë që autoritetet finlandeze dyshojnë se mund të jetë një akt sabotimi.
Ata ndaluan cisternën e naftës Eagle S, e cila lundron nën flamurin e Ishujve Kuk dhe spiranca e së cilës besohet të ketë dëmtuar kabllon.
Sipas BE-së, anija mund t’i përkasë të ashtuquajturës “flota hije” e Rusisë – cisterna dhe anije të tjera mallrash që Rusia i përdor jozyrtarisht, për shembull, për të anashkaluar sanksionet mbi dërgesat e naftës.
Paralajmërim nga Gjermania
Kallas, një ish-kryeministre e Estonisë, tha se sabotimi në Evropë është rritur që kur Rusia filloi një luftë kundër Ukrainës në shkurt 2022.
“Përpjekjet e fundit të sabotimit në Detin Baltik nuk janë incidente të izoluara, ato formojnë një model të planifikuar që synon të dëmtojë infrastrukturën tonë dixhitale dhe energjetike”, shtoi ajo.
Të shtunën, Ministrja e Jashtme gjermane, Annalena Baerbock, tashmë ka ngritur alarmin për “flotën hije” ruse dhe bëri thirrje për sanksione të mëtejshme të BE-së. Baerbock paralajmëroi se “flota e rrënuar ruse në hije” përbën një kërcënim serioz si për mjedisin ashtu edhe për sigurinë evropiane.
“Pothuajse çdo muaj, anijet aktualisht dëmtojnë kabllo të rëndësishme nëndetëse në Detin Baltik,” tha Baerbock. /tesheshi.com/
