Komisioni Europian e ka urdhëruar dje Italinë që të përdorë edhe forcën nëse është e e nevojshme për t’i detyruar refugjatët që t’i japin shenjat e gishtërinjve.
Në një deklaratë të komisionit, kërkohet prej Italisë një kornizë ligjore më solide për të lejuar përdorimin e forcës për marrjen e shenjave të gishtërinjve, si dhe thuhet shkoqur: “Synimi për një marrje 100 për qind të shenjave të gishtërinjve të refugjatëve të ardhur duhet të arrihet pa vonesë.”
Italia është akuzuar prej kohësh se e ka lejuar shmangien e regjistrimit të shumë prej refugjatëve, duke u dhënë atyre mundësi që të jenë të lirë të vijojnë rrugën drejt vendeve të tjera pa u penguar. Sipas Konventës së Dublinit, refugjatët janë të detyruar të regjistrohen dhe të kërkojnë azil në vendin e parë ku shkojnë.
Komisioni Europian lajmëroi javën e shkuar se po niste një procedim ligjor ndaj Italisë, Kroacisë dhe Greqisë për dështimin për të kryer marrjen e detyrueshme të shenjave të gishtërinjve të azilkërkuesve dhe për t’i kataloguar të dhënat brenda 72 orëve.
Me aktet e fundit terroriste, një problem më vete në dhënien zgjidhje vërshimit të refugjatëve është ai i kontrollit dhe i regjistrimit të tyre një për një, për të shmangur depërtimin e elementëve kriminalë në Europë.
Një takim i BE-së të enjten do të diskutojë krijimin e një force të re të ruajtjes së kufijve, që mund të ndërhyjë në shtetet anëtare pa pëlqimin e tyre. /tesheshi.com/
