Ministrat e Brendshëm dhe të Drejtësisë së BE-së janë mbledhur në Bruksel me kërkesë të Francës, për të dalë me vendimin për kontrolle të shtuara në kufij për ata që hyjnë e dalin, për kontrolle më të rrepta për armë, për mbledhje të dhënash për ata të cilët fluturojnë me linjat ajrore, e për ndarje të informacioneve sekrete. Nën kontroll do të jenë dhe paratë që lëvizin jashtë sistemeve bankare.
“Forcimi i kontrollit në kufijtë e jashtëm të BE-së është i domosdoshëm për mbrojtjen e qytetarëve europianë, veçanërisht në dritën e sulmeve të fundit terroriste,” u ka thënë gazetarëve ministri i Brendshëm francez, Bernard Cazeneuve.
Komisioneri për Emigracionin, Dimitris Avramopulos, ka sqaruar gjithashtu në një konferencë shtypi se nëse ndonjë prej vendeve të BE-së kërkon ta shtojë sigurinë e brendshme nën kërcënimin e tanishëm, mund të rifusë për një periudhë të caktuar kontrollet e kufijve të brendshëm.
Ndërsa zëvendëskryeministri i Luksemburgut, Etienne Schneider, është shprehur, “Korniza aktuale legjislative na lejon tashmë të kryejmë kontrolle sistematike dhe të bashkërenduara, duke përfshirë ato mbi njerëzit që kanë të drejtën e lëvizjes së lirë.”
Ndër masat e tjera, nga fundi i vitit pritet të paraqitet një projektreformë e kodit të Shengenit, ka lajmëruar Bernard Cazeneuve, “për të lejuar kryerjen e kontrolleve sistematike dhe të detyrueshme në të gjithë kufijtë tanë të brendshëm, e mbi të gjithë njerëzit që hyjnë në zonën Shengen, duke përfshirë ata që përfitojnë nga liria e lëvizjes.”
Teksa aktualisht pjesa më e madhe e qytetarëve të BE-së i nënshtrohen vetëm një kontrolli pamor të dokumenteve të tyre, vërshimi i refugjatëve nga vendet e Lindjes dhe aktet e fundit terroriste e kanë sjellë edhe një herë në vëmendje kthimin e kontrollit tradicional të kufijve. /tesheshi.com/
