Komisioni Europian e ka bërë të qartë këtë të hënë se nuk ka për t’u bërë pjesë e fushatës që do të zhvillohet para referendumit të qershorit në Britani.
“Komisioni nuk do të bëjë fushatë, nuk do të marrë pjesë në fushatë,” deklaroi zëdhënësi Margaritis Schinas në një konferencë shtypi.
“Roli ynë i ndërmjetësuesit mes qeverisë britanike dhe 27 partnerëve të saj ndalon këtu,” ka thënë ai, siç njofton agjencia e lajmeve AFP.
“Nuk shoh që Komisioni të ketë një rol në një fushatë që është për popullin britanik, e vetëm për popullin britanik.”
Bisedimet e javës së shkuar në Bruksel mes kryeministrit britanik dhe përfaqësuesve të BE-së përfunduan me një “status special” për Britaninë. Më 23 qershor do të zhvillohet në Britani referendumi për qëndrim apo dalje nga BE-ja, dhe David Cameron-i është në krye të fushatës për votën “pro”.
Por mes vetë konservatorëve situata nuk është rozë, teksa veç një pjese të vogël të kabinetit që nuk ndan të njëjtin mendim me kryeministrin, qëndrimin kundër e ka shprehur hapur dhe kryebashkiaku i Londrës, Boris Johnson. Një e treta e ligjvënësve konservatorë sugjerohet po ashtu të jetë në favor të një daljeje nga BE-ja.
Përkundër kësaj, unioni i vendeve europiane ka vendosur të mos përfshihet në fushatë. /tesheshi.com/
