Në kërkim të një zgjidhjeje afatgjate të krizës së refugjatëve, BE-ja ka thirrur për në fillim të marsit një takim të posaçëm me Turqinë.
“Plani i veprimit BE-Turqi është përparësia jonë,” deklaroi presidenti i Këshillit Europian, Donald Tusk, pas bisedimeve të një dite më parë në Bruksel.
Në lidhje me përpjekjet për frenimin e valës së pandërprerë të refugjatëve, Tusk tha se, “Duhet të bëjmë gjithçka që t’ia dalim. Kjo është arsyeja pse synojmë të organizojmë një takim të posaçëm me Turqinë në fillim të marsit.”
Turqia ka pritur gjer tani thuajse tre milionë refugjatë, më së shumti nga Siria, dhe në kuadër të një marrëveshjeje me BE-në i janë premtuar 3 miliardë euro në këmbim të mbajtjes së tyre brenda territorit të vendit.
Ashpërsimi i luftimeve në Halep të Sirisë ka sjellë në kufijtë e Turqisë mijëra sirianë të tjerë që po i ikin luftës. Kryeministri Ahmet Davutogllu e anuloi vizitën për në Bruksel pas shpërthimit vdekjeprurës mbrëmjen e së mërkurës në Ankara. /tesheshi.com/
