Komisioni Evropian njoftoi të martën se liderët e Kosovës dhe Serbisë do të diskutojnë të enjten në Bruksel të gjitha çështjet e hapura.
“Të gjitha çështjet e hapura do të zgjidhen dhe duhet të zgjidhen përmes dialogut ndërmjet Serbisë dhe Kosovës me ndërmjetësimin e Bashkimit Evropian”, u tha gazetarëve Nabila Masrali, zëdhënëse e KE-së për punët e jashtme.
BE do të “përqendrohet në fillimin e dialogut në të mirë të popullit të Serbisë dhe Kosovës”, theksoi ajo.
Masrali theksoi se BE-ja e konsideron të rëndësishme që të dyja vendet të sillen me përgjegjësi.
Përfaqësuesi i Lartë i BE-së për Politikë të Jashtme dhe Siguri, Josep Borrell do të presë të enjten kryeministrin e Kosovës Albin Kurti dhe presidentin serb Aleksandar Vuçiç, pas tensioneve të fundit mes dy vendeve.
Kurti dhe Vuçiç të mërkurën do të takohen veçmas me Sekretarin e Përgjithshëm të NATO-s, Jens Stoltenberg.
Ulja e tensioneve pas barrikadave
Kurti dhe Vuçiç pritet të diskutojnë për uljen e tensioneve që janë rritur së fundmi mes dy palëve.
Takimi i fundit mes Kurtit dhe Vuçiçit është mbajtur në korrik të vitit 2021.
Kurti dhe Vuçiç u takuan dy herë vitin e kaluar, por asnjëri nga takimet nuk dha rezultate konkrete.
Më 31 korrik, serbë të strukturave paralele, me kamionë dhe makineri të rënda bllokuan në nëntë vende rrugët që të çojnë në vendkalimet kufitare në Serbi, Jarinje dhe Bërnjak, në veri të Kosovës.
Bllokada u vendosën para fillimit të aplikimit të masave reciproke ndaj letërnjoftimeve serbe dhe fillimit të riregjistrimit të targave serbe me emërtimet e qyteteve të Kosovës në targa RKS (Republika e Kosovës).
Pas tensioneve për shkak të barrikadave dhe konsultimeve me partnerët ndërkombëtarë, qeveria e Kosovës mori përsipër ta shtyjë zbatimin e këtyre dy masave për 30 ditë, deri në fillim të shtatorit. /tesheshi.com/
