Kryeministri hungarez Viktor Orban është planifikuar të mbajë një samit të madh të politikës së jashtme në gusht. Megjithatë, ministrat e Punëve të Jashtme të Bashkimit Evropian synojnë të shpërfillin ftesën e Hungarisë dhe të marrin pjesë në një lloj kundërsamiti.
Hungaria, e cila mban presidencën e Këshillit të BE-së, planifikon të presë një samit të punëve të jashtme në Budapest më 28 dhe 29 gusht, një mundësi kryesore për Viktor Orbán që të përpiqet të formësojë axhendën e politikës së jashtme të BE-së dhe për ministrin e tij të jashtëm Peter Szijjarto, i cili pritet të jetë figura kryesore e samitit.
Megjithatë, pasi Orban pengoi ndihmën për Ukrainën, si dhe me vizitat e tij të ashtuquajtura paqeje tek Vladimir Putin dhe Xi Jinping, të cilat ai nuk i koordinoi me 26 liderët e tjerë kombëtarë të BE-së, shumë ministra të Jashtëm kërkuan një mënyrë për të mos u bërë mbështetës në atë që ata besonin se do të ishte një tjetër lojë propagandistike e Orbanit. Shefi i politikës së jashtme të BE-së, Josep Borrell, do të mbledhë ministrat për një këshill “formal” të punëve të Jashtme në të njëjtën kohë me samitin e Orbanit.
Duke bojkotuar samitin e Orbanit, ministrat europianë shpresojnë të kufizojnë mosrespektimin e Hungarisë ndaj anëtarëve të BE-së, si dhe frenimin politikës së Orbanit pa konsultim dhe pëlqimin e Brukselit.
“Nëse do të ketë një këshill formal të punëve të jashtme, të organizuar nga përfaqësuesi i lartë (Borrell) në të njëjtën ditë, ministrat nuk do të mund të shkojnë në Budapest”, tha një nga diplomatët anonimë për Politico.
Një tjetër shtoi se duke bojkotuar takimin në Budapest, ministrat e tjerë të jashtëm donin të “dërgonin një sinjal të qartë se Hungaria nuk flet në emër të BE”.
Kujtojmë se edhe para agresionit rus kundër Ukrainës, tensionet mes BE-së dhe Hungarisë po rriteshin prej vitesh. Sipas Brukselit, nën Orban vendi ka regres përsa i përket normave demokratike dhe shtetit të së drejtës, si dhe ka penguar funksionimin e qetë të BE-së.
Ministrat e vendeve të tjera të BE-së janë qartësisht të gatshëm t’i tregojnë gjakftohtësisht Hungarisë se nuk janë dakord me politikat e Orbanit.
Kujtojmë se në mbledhjen e parë të presidencës hungareze, të mbajtur në Budapest, ku u diskutua për politikën industriale, u shfaqën vetëm shtatë ministra nga vendet e tjera. Asnjë komisioner nuk mori pjesë. Plani i kundërsamitit tashmë është diskutuar joformalisht me disa vende të BE-së, duke përfshirë Francën dhe Gjermaninë. /tesheshi.com/
