Më shumë se 80 milionë euro janë dhënë në dispozicion nga Banka Evropiane e Investimeve (BEI) dhe Komisioni Evropian (KE) për nisjen e modernizimit të hekurudhës 148 kilometërshe në Kosovë, duke e lidhur atë me rrjetin evropian.
Marrëveshja për kredi në vlerë prej 42 milionë euro ndërmjet Qeverisë së Republikës së Kosovës dhe Bankës Evropiane të Investimeve (European Investment Bank), u nënshkrua sot nga Ministri kosovar i Financave Avdullah Hoti dhe zëvendësdrejtori i përgjithshëm i Bankës Evropiane të Investimeve Romualdo Massa Bernuçi, në praninë e Shefit të Zyrës së BE-së në Kosovë/Përfaqësuesit Special të BE-së, Samuel Zhbogar.
Marrëveshja për kredi në vlerë prej 42 milionë euro për financimin e projektit Rehabilitimi i Linjës 10 të Hekurudhës përbën njërin prej burimeve të financimit të projektit, ndërsa pjesa tjetër e financimit do të sigurohet në formë të kredive, granteve, si dhe nga buxheti i Republikës së Kosovës.
Hoti bëri të ditur se, “ky projekt do të bëjë rehabilitimin dhe modernizimin e linjës hekurudhore që përshkon Kosovën nga kufiri jugor me Maqedoninë (Hani i Elezit), e deri në kufirin verior me Serbinë (Leshak), me gjithsej 148 km. Ky projekt paraqet investimin më të madh të bërë ndonjëherë në rrjetin hekurudhor dhe pritet të kapë vlerën prej rreth 208 milionë euro”.
“Kredia që kemi nënshkruar sot me Bankën Evropiane për Investime paraqet një pjesë të financimit të nevojshëm, e që kap vlerën 42 milionë euro”, tha Ministri Hoti.
Zëvendësdrejtori i përgjithshëm i Bankës Evropiane të Investimeve, Romualdo Massa Bernuçi, bëri të ditur se kjo është kredia e parë e BEI-së për sektorin publik të Kosovës ndonjëherë.
“Kjo kredi kontribuon në angazhimin e Bankës për të mbështetur ‘veprimin klimatik’ si rezultat i zvogëlimit të përgjithshëm të pritur të gazrave serë që paraqiten nga ndryshimi i mënyrës së transportimit të mallrave dhe pasagjerëve si rezultat i këtij projekti”, tha Bernuçi.
Linja hekurudhore “Route 10” është 250 km e gjatë, prej së cilës 148 km janë në Kosovë dhe pjesa tjetër në Maqedoni dhe Serbi. Modernizimi pritet të nisë në fund të vitit 2016 dhe të finalizohet në fund të vitit 2020.
Rama ka vënë në dukje se, Shqipëria duhet ta ndërtojë të ardhmen e saj duke marrë si shembull historinë institucionale europiane. /tesheshi.com/
