Kompanitë evropiane mund të regjistrojnë kërkesën e tyre për gaz nga e marta për të marrë pjesë në blerjen e parë të përbashkët të gazit në nivel të Bashkimit Evropian, njoftoi të martën Komisioni Evropian.
Vitin e kaluar, vendet anëtare të BE-së vendosën të blejnë gaz së bashku në përpjekje për të siguruar çmime më të qëndrueshme për kompanitë dhe për të rimbushur depot e gazit, kujton dpa.
Çmimet e gazit me shumicë arritën nivele rekord verën e kaluar pasi Rusia uli ndjeshëm eksportet e gazit në BE dhe kompanitë e qeveritë u përpoqën të gjenin furnizues alternativë.
“Kriza energjetike na ka mësuar se BE-ja funksionon më mirë kur vepron e bashkuar dhe solidare,” tha në një deklaratë nënkryetari i Komisionit Evropian Maroš Šefčovich.
“(Bashkimi i kërkesës) … do të ndikojë në peshën ekonomike (të BE-së) dhe do të na ndihmojë të sigurojmë që të kemi mjaft gaz në magazinimin tonë për të kaluar të sigurtë dimrin e ardhshëm,” shtoi ai.
Përjashtohen kompanitë ruse
Kompanitë nga 27 vende anëtare të BE-së, si dhe nga Shqipëria, Bosnja dhe Hercegovina, Kosova, Maqedonia e Veriut, Gjeorgjia, Moldavia, Mali i Zi, Serbia dhe Ukraina mund të regjistrojnë nevojat e tyre për gaz në platformën online deri më 2 maj.
Furnizuesit globalë më pas mund të dorëzojnë ofertat e tyre nga 9 maji. Kompanitë në pronësi ose të kontrolluara nga Rusia janë të përjashtuara nga programi, tha zyrtari i paidentifikuar i BE-së. Kompanive pjesëmarrëse nuk u kërkohet të blejnë ose shesin gaz përmes platformës.
Parashikohet që tenderët për regjistrimin e nevojave për gaz të zhvillohen çdo dy muaj për 12 muajt e ardhshëm. /tesheshi.com/
