Trembëdhjetë anëtarë të Bashkimit Evropian kanë arritur një marrëveshje mbi kriteret për lëshimin e të ashtuquajturës një “pasaportë e gjelbër” që do të lehtësonte rrjedhën e turistëve gjatë pandemisë, u njoftua të hënën në Vjenë.
“Qëllimi ynë është të zbatojmë pasaportën e gjelbër shpejt dhe mundësisht në një formë uniforme në nivelin e BE,” i tha APA-s ministrja austriake e Turizmit Elisabeth Koestinger.
Ajo tha se ishte një çështje mbijetese për turizmin evropian.
Kroacia, Austria, Qiproja, Danimarka, Franca, Gjermania, Greqia, Italia, Malta, Portugalia, Sllovenia dhe Spanja ranë dakord në fund të marsit mbi shtatë kritere për lëshimin e një pasaporte të gjelbër, të cilat duhet të zbatohen më së voni në fillim të qershorit.
Kjo pasaportë menjëherë siguron informacion përmes kodit QR nëse personi është vaksinuar, testuar apo ka kontraktuar koronavirusin.
Të dhënat e ndjeshme shëndetësore të mbajtësve të pasaportave të gjelbra gjithashtu do të mbesin në vendin e origjinës dhe nuk do të ruhen nga qendra në nivelin e BE-së.
Një qëllim i mëtejshëm është harmonizimi i zbatimit të pasaportës së gjelbër me vendet e treta.
Lista e kritereve, siç u tha, u paraqit për kontroll në Komisionin Evropian, i cili duhet të marrë një vendim mbi zbatimin në ditët në vijim. /tesheshi.com/
