Anëtarët e BE duhet të marrin para nga buxheti i përbashkët dhe fondi i rimëkëmbjes së pandemisë vetëm nëse ata kanë një sistem të fortë gjyqësori dhe antikorrupsioni, tha nënkryetarja e Komisionit Evropian Vera Jourova, duke paralajmëruar indirekt Poloninë dhe Hungarinë.
Drejtuesit e 27 vendeve do të takohen javën e ardhshme në Bruksel për të rënë dakord mbi shpërndarjen e afro 2,000 miliardë eurove nga buxheti i 2021-27, me fonde të veçanta për rimëkëmbjen ekonomike të kontinentit pas pandemisë COVID-19.
Kushtet për marrjen e parave, në lidhje me standardet demokratike ose reformat ekonomike, janë ndër pikat më të diskutueshme për shkak të të cilave marrëveshja e nevojshme për vendime të tilla nuk është arritur deri më tani.
“Sundimi i ligjit duhet të jetë një kusht për shpërndarjen e parave evropiane,” u tha Jourova ministrave të drejtësisë të BE.
Ndër parakushtet e nevojshme për marrjen e ndihmës, ajo përmendi “drejtësi funksionale” dhe mekanizma të fortë antikorrupsion.
Ky është kuptuar në fakt si një paralajmërim për Poloninë dhe Hungarinë, të cilat janë në mosmarrëveshje me BE mbi nivelin e mbikëqyrjes së qeverisë mbi gjykatat dhe gjyqtarët, si dhe Rumaninë dhe Bullgarinë, të cilat kanë probleme me korrupsionin dhe varfërinë për vite me radhë pas anëtarësimit në Union.
“Nuk do të doja të shihja para të ndaluara, por në sistemin tonë juridik duhet të kemi disa garanci se nëse gjërat shkojnë me të vërtetë keq në një shtet anëtar, paratë e taksapaguesve nuk mund të paguhen,” tha Jourova për fondet e financuara nga kontributet kombëtare, pra indirekt nga taksat. /tesheshi.com/
