Bashkimi Evropian do të japë afro 2.5 miliardë euro ndihmë për Sirinë këtë vit dhe vitin e ardhshëm, njoftoi presidentja e Komisionit Ursula von der Leyen.
Në konferencën e nëntë të donatorëve të mbajtur në Bruksel, von der Leyen njoftoi këtë ndihmë për Sirinë në periudhën e tranzicionit dhe për rimëkëmbjen socio-ekonomike.
Kjo ndihmë është menduar për nevoja urgjente humanitare brenda Sirisë dhe për sirianët në mërgim në Jordani, Liban, Irak dhe Turqi.
“Një rrugë e gjatë drejt pajtimit”
Për këtë vit, BE-ja ka rritur ndihmën e saj nga konferenca e mëparshme, e tetë e donatorëve nga 560 milionë euro në 720.5 milionë për ndihmën për sirianët brenda vendit dhe në vendet fqinje. Për vitin 2026, premtoi 600 milionë euro shtesë dhe 1.1 miliardë për refugjatët sirianë në Turqi për këtë dhe vitin e ardhshëm.
“Rruga drejt pajtimit dhe rimëkëmbjes është e gjatë, por për herë të parë në dekada, shpresat siriane po bëhen realitet. Siria mund të bëhet një shtet ku të gjithë mund të thonë mendimin e tyre, me të drejta dhe përfaqësim të barabartë për të gjithë – burra dhe gra njësoj, pavarësisht nga feja, përkatësia etnike dhe ideologjia“, tha von der Leyen. /tesheshi.com/
