Bashkimi Europian planifikon të dërgojë edhe 10 mijë roje kufitare për të menaxhuar emigracionin e paligjshëm, deri në vitin 2020. Planin e parashtroi presidenti i Komisionit Europian, Jean-Claude Juncker në fjalimin e përvitshëm për situatën në bllok.
Ai apeloi për më shumë solidaritet, në vend të zgjidhjeve “ad-hoc” në lidhje me anijet e emigrantëve.
“Ne nuk do ta militarizojmë Bashkimin Europian. Ajo që ne duam është të bëhemi më autonomë dhe të përmbushim përgjegjësitë tona globale”, tha ai.
Fjalimi i tij përfshiu edhe çështje të tjera të mprehta të rajonit – populizmin, terrorizmin dhe Brexit. Këto janë 12 muajt e fundit të Junkcker në detyrë.
Ai propozoi po ashtu edhe një aleancë të re Afrikë-Europë, bazuar në bashkëpunim dhe jo në bamirësi, që do të sjellë një marrëveshje të tregtisë së lirë midis dy kontinenteve.
Ai rekomandoi që euro të përdoret në mënyrë më strategjike si valuta më e madhe pas dollarit.
Gjithsesi, sipas analistëve, Junkcer u tregua i gatshëm të përgëzonte veten aty ku ai kishte mundësinë. Mesazhi i tij kryesor: Europa po shkon në drejtimin e duhur (edhe pse nuk mund të vetëkënaqemi). Por, ku shkoi pasioni? Sondazhet e opinionit publik në të gjithë Europën tregojnë se njerëzit janë më në favor të BE-së nga ç’kanë qenë vitet e fundit por – dhe kjo ka një rëndësi të jashtëzakonshme – ata po ashtu janë më shumë simpatizues të partive populiste, që shpesh janë nacionaliste dhe euroskeptike.
Këto parti priren të fitojnë midis votuesve për shkak të mesazheve të tyre që në kundërshtim me ato të partive tradicionale dhe atyre që ata i quajnë teknokratët e izoluar të Brukselit, janë dëgjesa të shqetësimeve të njerëzve dhe një përkujdesje ndaj çështjeve sociale.
Partitë populiste pritet të dalin shumë mirë në zgjedhjet e ardhshme të majit për Parlamentin Europian. Juncker foli pak për ndryshimin që duhet të ndodhë në adresimin e zgjedhësve të pakënaqur.
Në fjalimin e tij, Jean Claude Juncker po ashtu, bëri një propozim dukshëm kontrovers për të hequr veton e vendeve anëtare të BE-së ndaj disa taksave dhe çështjeve të politikës së jashtme. Me gjasa ky propozim do të zemërojë kritikët e BE-së të cilët e akuzojnë atë si një institucion jo demokratik.
Përgatiti: Juli Prifti – /tesheshi.com/
