Një ditë pasi që kreu i Bashkimi Demokratik për Integrim, Ali Ahmeti ka paralajmëruar reforma të brendshme partiake, si pasojë e akuzave të njëpasnjëshme ndaj funksionarëve të saj, ka reaguar nënkryetari dhe deputet i Lëvizjes BESA, Zeqirija Ibrahimi. Ai në një status në rrjetin social facebook ka shkruar se nuk mund t’i beson syve që BDI me të vërtetë dëshiron të reformohet dhe pastrohet nga kriminelët e saj.
Lexova se BDI (Bashkimi Demokratik i Interesave) paska mbajtur mbledhje dhe paskan vendosur që tash e tutje ta reformojnë partinë dhe, madje, të mundësojnë të zhvillohen hetime të pavarura ndaj çdo funksionari të partisë, që ashtu të mund të dalë në shesh pastërtia e kësaj partie.
Pasi e lexova tri herë, se nuk u besoja syve, më duhet t’i parashtroj tri pyetje:
1. A i bie kjo se deri tash ata e kanë toleruar krimin e korrupsionin, që tash paskan vendosur ta ndërmarrin këtë hap? (Në të vërtetë, vetëm ata që e ndjejnë fajtorë, dëshirojnë të shfajësohen.)
2. Si mund t’u besojmë se do ta bëjnë këtë kur një ditë më parë vendosën që të jenë pjesë e qeverisë? Duke e ditur se si ata i kishin emëruar prokurorët e gjykatësit (bashkë me Naçallnikun e tyre), a thua u beson dikush se ata që janë në pushtet mund të lejojnë të bëhen hetime të pavarura? (Nëse janë të sigurt se janë pastër dhe duan të hetohen, le ta mbështesin një qeveri reformuese dhe le të rrinë në opozitë, që ashtu ta dëshmojnë pafajësinë!)
3. Nëse kjo parti ishte e sinqertë se vërtet dëshiron hetime të pavarura, që të dalë në shesh se sa janë të pastër, a thua pse nuk e votuan zgjatjen e mandatit të hetimeve të Prokurorisë Speciale Publike dhe pse nuk e votuan Ligjin e mbrojtjes së dëshmitarëve?
Unë e di se atyre u zien nën këmbë dhe se tash duan disi ta luajnë rolin e të pastruarit nga mëkatet, por harrojnë se shqiptarët nuk e kanë humbur aq shpejt memorien. Është ofendim ndaj shqiptarëve të besosh se ne kemi harruar se kush janë ata.
E njohim mirë mallin, sado që mund t’i bëhet dizajn i mirë. Edhe nëse bëhet me ambalazh dhe logo të coca-colës, boza përsëri mbetet bozë.
Përveç reformimit partiak, nga BDI nëpërmjet një komunikate drejtuar mediave kanë thënë se për të zbardhur të vërtetën e plotë mbi akuzat e disa zyrtarëve të BDI-së, ata do të angazhohen për hulumtim të thellë të veprimtarisë së çdo funksionari nga viti 2002 gjer më sot dhe bartje të përgjegjësisë për çdo keqpërdorim eventual të besimit partiak dhe detyrës zyrtare.
“Duke qenë të sigurt në veprimtarinë tonë, ky hap paraqet përkushtim të palëkundur për zbardhjen e së vërtetës dhe nismë reformuese për vijimin e qëndrueshëm të BDI-së si vlerë kombëtare, nëpërmjet largimit ligjor dhe institucional të të gjitha dyshimeve, por edhe shpifjeve të vazhdueshme tendencioze në adresë të BDI-së”, qëndron në komunikatën e BDI-së. /teshesh.com/
