Pas një tjetër mbledhjeje të kryesisë, BDI ka vendosur që të jetë pjesë e qeverisë së re maqedonase në koalicion me LSDM-në. Në përfundim të saj, zëdhënësi Bujar Osmani doli para mediave dhe kumtoi:
“Kryesia Qendrore e BDI-së, njofton qytetarët, institucionet e vendit dhe miqtë tanë të komunitetit ndërkombëtar se dhënia e nënshkrimeve për përkrahjen për të marrur mandatin për formimin e qeverisë, njëkohësisht nënkupton edhe përkrahje për formimin e shumicës së re parlamentare dhe qeveri e re e Maqedonisë në frymën e Marrëveshjes së Ohrit dhe e përkushtuar në sundimin e së drejtës dhe integrimit në NATO dhe BE. Pjesëmarrja e BDI-së, në qeverinë e re e reflekton vullnetin e popullit shqiptar e shprehur në zgjedhjet e fundit më 11 dhjetor dhe ka për qëllim përmbushjen e programit që është premtuar para qytetarëve në këto zgjedhje.”
Nga ana tjetër, BDI, nëpërmjet zëdhënësit Osmani, i bën thirrje presidentit Ivanov që të plotësojë detyrimin kushtetues duke u dhënë mandatin Zaevit, aleatit të ri pra.
“I bëjëm thirrje Ivanovit që në përputhje me obligimiet e tij Kushtetuese si dhe me kërkesën e tij që gjatë konsultimeve me të gjitha partitë parlamentare, t’i ndanë mandatin për formimin e qeverisë, shumicës së re parlamentare të konfimruar me nënshkrimin e 67 deputetëve në Kuvendin e Maqedonisë. Njëkohësisht ftojmë z.Ivanov si dhe partitë politike në Maqedoni të jenë të matur dhe të përkujdesshëm në deklaratat e tyre në mënyrë që të mos rrezikojnë të ardhmen e përbashkët të qytetarëve të Maqedonisë.
BDI më tej iu përmbajt qëndrimit se Platforma Shqiptare, ajo pra të cilën nuk e pranon Gruevski, është në përputhje me Marrëveshjen e Ohrit dhe me Kushtetutën e vendit.
“….në asnjë mënyrë nuk cenon integritetin territorial apo nuk rrezikon karakterin unitar të vendit. Gjithashtu asnjë rresht i vetëm në këtë deklaratë nuk cenon Kushtetutën e Maqedonisë. Partitë politike shqiptare dhe as Deklarata nuk ishin shkas për krizën sistemore, politike dhe institucionale në vend dhe duke pasur këtë parasysh, ftojmë partitë politike të përmbahen nga të shndërruarit e kësaj krize politike në përplasje ndëretnike ndërmjet dy komuniteteve shumicë në Maqedoni”, tha zëdhënësi Osmani. /tesheshi.com/
