Nga Mensur Krasniqi
Pas vrasjes së kryetarit të komunës së Bogovinës, Hazbi Idrizi, kanë dalë edhe informatat e para zyrtare mbi aktin tragjik nga ana e policisë dhe Prokurorisë Publike në Maqedoni.
Sipas policisë, aktit i ka paraprirë një mosmarrëveshje verbale.
“Sot (06:05:2017) në orën 10:45 në Qendrën mediacinale në Tetovë është sjellë H.I (58) kryetar i komunës Bogivinë, i cili ka pasur disa plagë në trup të marra nga një armë zjarri. Menjëherë më pas, në Qendrën medicinave në Tetovë është konstatuar se H.I ka humbur jetën. Vrasjen e ka kryer Q.A (53) nga fshati Bogovinë në një objekt hotilierik në afërsi të komunës. Ngjarjes i ka paraprirë mosmarrëveshja verbale ndërmjet H.I dhe Q.A. Më pas Q.Q ka tentuar të vetëvritet duke shtënë një plumb në kokë. I njëjti me makinë të ndihmës së shpejtë është dërguar në Qendrën e Urgjencës në Shkup për kurim.
Nga ana tjetër sipas Prokurorisë Themelore Publike-Tetovë e cila ka kryer hetim në vendngjarje, vrasësi ka parkuar makinën në afërsi të komunës Bogovinë dhe është drejtuar kah byrektorja nga ana e kundërt, ku në atë moment ka qenë i ulur kryetari i komunës. Pasi ka kryer aktin e vrasjes, i njëjti ka tentuar të vetëvritet rrugës për në shtëpi.
“Pas një mosmarrëveshje të shkurt, i dyshuari ka shtënë disa plumba. Pas rastit i dyshuari, përndryshe ish i punësuar në komunën e Bogovinës, është drejtuar për në shtëpi, ku ka tentuar të vetëvritet. Kryetari i komunës me makinë është dërguar në spitalin në Tetovë ku është konstatuar vdekja, ndërsa i dyshuari për shkak seriozitetit të lëndimit është dërguar në Qendrën për urgjencë në Shkup. Prokurori publik për momentin ka lëshuar urdhër për obduksion mbi trupin e personit të vdekur, urdhër për grumbullimin e gjurmëve nga vendi i ngjarjes si dhe urdhër për ekspertizë kriminalistike dhe teknike”, thuhet në komunikatën e Prokurorisë Publike.
Ngushëllimet e tyre për vrasjen e kryetarit të komunës së Bogovinës, Hazbi Idrizit i kanë shprehur nga partia e tij, Bashkimi Demokratik për Integrim, të cilët thonë se janë të tronditur thellë nga humbja e anëtarit të tyre, dhe njëkohësisht kërkojnë nga institucionet të zbardhin motivet për këtë vrasje.
“BDI është tronditur sot thellë nga lajmi për vrasjen e anëtarit të familjes sonë dhe Kryetarit të Komunës së Bogovinës, Hazbi Idrizi gjatë kryerjes së punës së tij zyrtare në shërbim të qytetarëve. Zemrat dhe mendjet tona në këto momente të rënda janë me familjarët dhe dashamirët e Hazbi Idrizi. Ftojmë institucionet të zbardhin motivet për këtë vrasje makabre e cila ka qenë paprovokuar në asnjë mënyrë. Të qoftë i lehtë dheu Hazbi”, thonë nga BDI. /tesheshi.com/
