Nga Mensur Krasniqi
Është dashur dhe një tjetër mbledhje deri në orët e vona të natës që kryesisë qendrore të BDI-së të marrë vendimin përfundimtar për t’ja dhënë 60 nënshkrime kreut të LSDM-së, Zoran Zaev si kusht kusht kushtetues për t’u mandatuar në lidhje me formimin e qeverisë së re. Por partia e Ali Ahmetit e ka përjashtuar domosdoshmërisht veten nga të qënit në qeveri.
Zëdhënësi Bujar Osmani, në prononcimin para gazetarëve bëri të ditur se fakti që ato vendosen t’i japin nënshkrimet nuk do të thotë se patjetër kanë vendosur të bëjnë koalicion me LSDM-në. Osmani tha se përveç formimit të qeverisë me LSDM-në, alternativë tjetër është edhe mundësia tjetër për të mbetur në opozitë sepse qëllimi i tyre është realizimi i programit dhe jo pjesëmarrja me çdo kusht në qeveri.
“Kemi vendosur që nënshkrimet t’ia japim Lidhjes Socialdemokrate të Maqedonisë, por kjo nuk do të thotë se ne q që po japim edhe “Amin”-in për formimin e qeverisë të bëjmë koalicion me LSDM-në. Nënshkrimet i japim me qëllim që të respektohen disa afate, siç që janë shpallja e zgjedhjeve lokale, sepse prolongimi i tyre nuk shkon në interes të qytetarëve të Maqedonisë. Në lojë janë të gjitha opsionet; domethënë shtjellohet opsioni i mbetjes në opozitë ose i përkrahjes së qeverisë së pakicës, sepse interesi ynë nuk është pjesëmarrja në qeveri me çdo kusht por realizimi i programit tonë politik. Ka mendime të ndara edhe për mbetje në opozitë edhe për qeveri”, tha zëdhënësi Osmani.
Gjithçka ka ardhur pasi LSDM ra dakort në respektimin e Platformës Shqiptare, e sidomos pikës së dygjuhësisë, pikërisht kësaj për të cilën nuk ra dakort Gruevski, duke pranuar të dalë dhe në opozitë, mjaft që shqiptarëve mos jua jepte shansin që të diktonin edhe shqipen si gjuhë zyrtare.
Tashmë pritet që Zaev t’i dorëzoje presidentit Ivanov 60 nënshkrimet shqiptare, si kusht për të marrë mandatin e formimit të qeverisë së re. Por ajo që mbetet ende e papërcaktuar është forca shqiptare me të cilën do udhëheqë LSDM-ja, nisur nga deklarimi i zëdhënësit të BDI-së se jo patjetër do jenë në qeveri. Kjo e fundit njihet si aleate e VMRO-së, me të cilën është në koalicion prej afro 10 vitesh. /tesheshi.com/
