Media greke ka pretenduar se autoritetet shqiptare nuk i kanë ftuar ata greke në inaugurimin e Bazës së Kuçovës, tashmë e NATO-s.
Kjo ka bërë që të reagojë Ministria jona e Mbrojtjes, duke thënë se ministri Nikos Dendias nuk e ka pasur një ftesë zyrtare që në 29 janar, por që ai e kishte pasur të pamundur të merrte pjesë në 4 mars dhe se në vend të tij morën pjesë zyrtarë të lartë nga ambasada e vendit fqinj.
“Shqipëria dhe Greqia gëzojnë një nivel shumë të mirë bashkëpunimi në fushën e sigurisë dhe mbrojtjes si aleatë të përkushtuar të NATO-s. Jemi mirënjohës ndaj Greqisë (dhe Italisë) që për vite me radhë kanë kryer Policimin Ajror për vendin tonë.
Me të njëjtën qëllim, më 29 janar, Ministri i Mbrojtjes së Shqipërisë dërgoi një ftesë zyrtare homologut të tij grek për të bërë një vizitë zyrtare në Shqipëri, që përkonte në të njëjtën kohë me ceremoninë e inaugurimit të Bazës Taktike Ajrore të Kuçovës. 
Më 14 shkurt, morëm përgjigjen se për shkak të angazhimeve të paracaktuara, Ministri i Mbrojtjes Dendias nuk do të mund të merrte pjesë në ceremoninë e 4 marsit. Në vend të tij, zyrtarë të lartë nga Ambasada e Greqisë në Tiranë morën pjesë në këtë ceremoni.
Jemi të keqardhur për lajme të tilla që nuk pasqyrojnë të vërtetën dhe realitetin në lidhje me bashkëpunimin tonë me shtetin tonë fqinj, Greqinë dhe që nxisin keqkuptime mes dy vendeve tona mike”, thuhet në reagimin e Ministrisë së Mbrojtjes për artikullin e mediave greke. /tesheshi.com/
