Bayern i Munich ka vuajtur për të marrë 3 pikët në ndeshjen kundër Werder Bremen. Bavarezët janë gjendur të surprizuar nga kundërshtari, i cili luajti gjithçka për gjithçka në këtë ndeshje, duke kaluar edhe në avantazh.
Mueller gjeti barazimin për Bayern, i cili luajti pa shkëlqimin e zakonshëm. Ndërsa në pjesën e dytë, me aktivizimin e Lewandovski-t, Bayern shton pikat e referimit.
Është pikërisht polaku që pas një goditjeje këndi, shënon me kokë, duke kaluar skuadrën e tij në avantazh.
E pikërisht kur u mendua se gjithçka u mbyll, Werder reagon dhe pas një goditjeje këndi, Sule devijon pa dashje topin në rrjetën e tij, duke shkaktuar barazimin e rezultatit.
Por bavarezët nuk kanë pësuar ndonjë shok të mundshëm, e pas 2 minutash gjejnë avantazhin 3-2, pas një tjetër gjuajtjeje me kokë të Lewandovski.
Për të mbyllur llogaritë ka menduar sërish Muller, që pas një asisti të bukur të James Rodriguez, shënon nga afër porte.
Pas kësaj fitoreje, Bayern e ka çuar në plus 16 avantazhin ndaj ndjekësve, duke hipotekuar titullin në Bundesligë. /tesheshi.com/
