Një dekret i Landit të Bavarisë për të vënë kryqet e krishtera në ndërtesat publike ka ndeshur në polemika të forta në të gjithë Gjermaninë.
Ky vendim është marrë përpara zgjedhjeve në landin jugor të Gjermanisë, aty ku pushteti i Kishës Katolike është i rëndësishëm edhe në politike.
Bavaria është landi i parë i madh ku shumica e banorëve janë katolikë në Gjermaninë me shumicë protestante.
Dekreti hyri në fuqi sot dhe bëhet përpara zjgjedhjeve të rëndësishme në këtë land.
Universitetet, muzetë dhe teatrot janë këshilluar që të vendosin të paktën një kryq në fasadat e tyre, bëri të ditur një zëdhënëse e Ministrisë së Arteve dhe Shkencës bavareze.
“Detyrimi për të ngritur kryqe në zonën e hyrjes vlen edhe për të gjitha autoritetet nën Ministrinë e Artit dhe Shkencës, me përjashtim të kolegjeve, teatrove dhe kinemave”, tha ajo. “Për ta ka një rekomandim”.
Markus Soeder, kryeministri konservator i Bavarisë, shpalli këtë vendim në prill, duke thënë se “kryqi është një simbol themelor i identitetit tonë bavarez dhe mënyrës së jetës”.
Por urdhri shkaktoi një zemërim, dhe kritikët e akuzojnë Soeder se po e politizon besimin në një shtet laik.
Mendohet që CSU, Partia Kristian Sociale po synon që të të tërheqë votuesit katolikë që kanë votuar zgjedhjet e shkuara për AFD-në e ekstremit të djathtë.
“Soeder ka keqpërdorur kryqin për një manovrim zgjedhor”, tha shefja e socialdemokratëve të Landit, Natascha Kohnen në të përditshmen Augsburger Allgemeine.
Soeder gjithashtu është kritikuar gjerësisht, duke përfshirë edhe Kryeministrin e landit fqinj të Baden-Wuerttemburg, Winfried Kretschmann, i cili, duke përdorur një ironi therrëse, tha se kur pa një foto të kolegut të tij me kryq, kujtoi se “ajo ishte reklamë e filmave me vampirë”.
Por thirrja më e rëndësishëm ka ardhur nga organi zyrtar i Kishës Katolike gjermane.
Kardinali Reinhard Marx, president i Konferencës Ipeshvnore të Gjermanisë, paralajmëroi Soeder se “nuk duhet asesi ta përdorte kryqin si një propagandë politike”.
“Ai është një simbol i besimit të krishterë, ngaqë tregon kryqëzimin e Jezu Krishtit dhe i tillë duhet mbetet. Askush nuk duhet të lypë vota me kryq; është jo thjesht e gabuar por edhe e ndaluar”, tha Marx në një intervistë me të përditshmen prestigjoze Sueddeutsche, duke shtuar se “kryqi nuk përjashton besimtarët e tjerë, përkundrazi është një simbol i tolerancës dhe dashurisë njerëzore”.
Soeder pritet të vizitojë Vatikanin, ku ka siguruar një takim me Papa Françeskun dhe Papën Emeritus Benedikti XVI, i cili është vetë një bavarez.
Pasi shënoi rezultatin më të keq që nga shtatori 1949 zgjedhje, CSU – Partia motra e CDU-së e kancelares Angela Merkel – dëshpërimisht kërkon të tërheqë votuesit e ekstremit të djathtë për t’u rikthyer tek ajo.
Duke bërë fushatë në një platformë anti-islame, partia ekstremiste AfD ka kapitalizuar frikën e Gjermanisë për ardhjen e më shumë se një milion azilkërkuesish, shumica nga vendet muslimane.
Pasi u bë forca më e madhe opozitare në parlament, AfD është gati të hyjë në legjislaturën e shtetit të Bavarisë.
Peizazhi politik gjithnjë e më i fragmentuar në Gjermani do të thotë që CSU mund të humbasë shumicën absolute në Bavari, duke e kthyer fenë dhe emigracionin si temën kryesore të fushatës. /tesheshi.com/
