Seanca maratonë në Kuvendin e Shqipërisë ku pas 24 orësh debati dhe diskutimesh u miratua programi dhe qeveria “Rama2” ka shënuar disa batuta mes ligjvënësve dhe Kryeministrit.
Kryeministri Rama nuk ka kursyer batutat në drejtim të LSI-së, për të cilën tha se është gjendur e befasuar nga kalimi në opozitë dhe sot e sheh veten të ulur prapa kurrizit të PD-së.
“Nuk më vjen as keq as mirë, ky është një fakt i jetës, që një opozitë tjetër, e ulur atje poshtë pas kurrizit të PD-së, pas 8 vjetësh ulur këmbëkryq në tepsinë e pushtetit, u shfaq këtu e mbistresuar nga humbja e vendit të punës.
Siç ju thashë edhe opozitarëve të përbashkët, po jua them edhe ju pas kurrizit të tyre, mos e kërkoni jashtë vetes shkakun e disfatës tuaj dhe mos i merrni shqiptarët për budallenj, që mund ti tërhiqni nga hunda duke iu bërë predikimi sikur sapo zbritet nga qielli. Dhe kujdes me atë parullën “qeveri e vogël korrupsion i madh” se tingëllon qamet si një lapsus frojdjan mbi marrëdhëniet që keni ju vetë me pushtetin.
Më vjen shumë mirë që pas kushedi që kur ky kuvend e nisi punën në orar dhe një debat kaq i gjatë dhe i lodhshëm u zhvillua sidoqoftë në një ecuri shembullore mbi binaret e rregullores”, tha Rama.
Ndërkkohë një tjetër batutë ishte me deputetin demokrat Ervin Salianji. Ky i fundit gjatë fjalës në Kuvend artikuloi akuza në drejtim të qeverisë së re, kryeministrit Rama, por edhe ish-ministrit të Brendshëm, Sajmir Tahiri.
Por, kryeministri Rama herë pas here shfaqej duke tundur kokën dhe duke thënë “po, po”, ndërsa në fund të fjalës së Salianjit, e ka thumbuar: “më nxorre mallin e Violeta Manushit (teto Ollga)”.
Ndërsa Salianji në përgjgjen e tij e krahasoi Ramën me Koçin. /tesheshi.com/
