Kuvendi do të mblidhet nesër në seancë plenare ku gjatë paradites do të bëhet verifikimi i mandateve dhe betimi i deputetëve, ndërsa në orët e pasdites do të votohet për kryetarin e Parlamentit, për të cilin socialistët kanë zyrtarizuar kandidaturën e Gramoz Ruçit.
Por nga dita e nesërme, një pjesë jo e vogël e politikanëve shqiptarë, që të paktën në 10 apo 20 vitet e fundit kanë mbajtur funksione të rëndësishme apo ishin figura qendrore në partitë ku aderonin, do të humbasin privilegjet që përfitonin si deputetë.
Më të prekur janë disa prej deputetëve demokratë, të cilët duke filluar nga nesër do të quhen ish-ligjvënës, pasi edhe ligjërisht i mbaron mandati 4 vjeçar.
Dhe duket se Majlinda Bregu nuk ka nguruar të lëshojë batutën, duke thënë se “nga nesër do të jem e papunë”.
Kuptohet që kjo është vetëm një shaka, pasi shumë nga ligjvënësit, të cilët edhe më parë kanë humbur statusin e deputetit, nuk është se kanë mbetur të papunë. Për ta gjithmonë janë gjetur “xhepa” në administratë apo institucionet ndërkombëtare. /tesheshi.com/
