Qeveria Rama ka paralajmëruar nisjen e një aksioni për të rivlerësuar tokat në bredget, aty ku thuhet se është bërë batërdia gjatë tranzicionit, e ku dhe ministria e Rendit po çon për procedim penal abuzuez nga radhët e administratës shtetërore.
Ishte kreu i ALUIZN-it, Artan Lame, që bëri me dije fushatën e rikthimit të shtetit në vijën bregdetare.
“Qeveria po përgatit skemë veprimi si nevojë për të sqaruar një pjesë mish-mashi me pronat në zonat bregdetare të vendit, me atë pjesë që lidhet me ndarjen e këtyre zonave në mënyrë abuzive, apo AMTP-së. Qeveria synon t’i thotë fund këtij procesi të turpshëm dhe t’i rikthejë shtetit pronat e grabitura në këtë mënyrë. Nga ky fenomen zhvatjeje ka vuajtur e gjithë zona bregdetare e vendit. Si zona të tilla, Velipoja, Lezhë Shëngjin, Kune Vain, ishull Lezhë, Gjiri i Lalzit, Spille në Kavajë, Seman, Nartë, Orikum dhe të gjithë bregdetin e Rivierës në përgjithësi në jug. Janë ndarë duke i konsideruar si toka bujqësore zona e rërës e plazheve, brezit pyjor të bregdetit, kënetat, ligatinat, moçalet. Janë ndërruar zërat kadastralë”, tha Lame, i cili më pas përcolli një paralajmërim.
“Një pjesë po mundohen të humbasin gjurmët e krimit duke i shitur, rishitur, ndarë e rindarë këto parcela të fituara në rrugë të kundraligjshme. Në këto kushte, u bëjmë thirrje qytetarëve shqiptarë që në padijeni mund të bien në kurthe të tilla, të tregohen të kujdesshëm në momentin që duhet të blejnë toka në zona bregdetare”, shtoi kreu i ALUIZN-it. /tesheshi.com/
