Zyrtarë të lartë ushtarakë amerikanë kanë takuar homologët e tyre turq në Ankara për të kërkuar miratimin për nisjen e një lëvizjeje masive të drejtuar nga kurdët me qëllim izolimin e ISIS në bastionin e tyre Raqqa në Siri.
Aleanca e grupeve të armatosura kurde dhe arabe- Forcat Demokratike Siriane- njoftoi të dielën se izolimi i Raqqa-s kishte nisur si pjesë e një lëvizjeje strategjike për të mposhtur ISIS jo vetëm në Raqqa por edhe në Mosul, qytetin e dytë më të madh të Irakut.
Koalicioni kurdo-arab pretendoi se Shtetet e Bashkuara kishin rënë dakord që Turqia dhe fraksione të grupit nuk do të luanin rol në sulm, dhe se ofensiva do të mbështetej nga ajri prej amerikanëve.
Më parë, Ankaraja kishte shprehur alarm që koaliconi në fjalë dominohet nga njësi të milicive të mbrojtjes së popullit kurd (YPG) të cilat i konsideron si zgjatime të partisë së Punëtorëve të Kurdistanit dhe i ka shënjestruar ata disa herë brenda territorit sirian.
Në një përpjekje për të matur reagimin turk ndaj koalicionit kurdo-arab, zyrtari i lartë amerikan Joseph Dunford, u takua me homologun turk, Hulusi Akar, në Ankara.
Shtetet e Bashkuara e shohin SDF-në, koalicionin kurdo-arab si forcën luftarake më efektive në veri të Sirisë, por Turqia ka përsëritur shpesh se nuk do të tolerojë rol masiv të kurdëve në sulmin ndaj Raqqa-s dhe ka ndërhyrë për të kufizuar zonën e kontrolluar nga kurdët në Siri.
Duke njoftuar sulmin në Raqqa, në një konferencë shtypi në Ain Issa, një lokalitet rreth 30 milje në veri të Raqqa-s, zëdhënësja e koalicionit, Jihan Sheikh Ahmed, se “ka nisur beteja e madhe për të çliruar Raqqa-n dhe rrethinat e saj”.
Ahmed tha se operacioni, i quajtur “Zemërimi i Eufratit”, do të përfshijë rreth 30 mijë luftëtarë dhe ka nisur natën e së shtunës. Sipas saj, operacioni synon të largojë nga Raqqa ata që i quan “forcat e terrorizmit global, obskurantist të përfaqësuar nga ISIS që e kanë shpallur atë kryeqytetin e supozuar të tyre”.
Ndërkaq, zëdhënësi i koalicionit kurdo-arab, Talal Sello tha se operacioni do të procedojë në dy faza, “së pari me çlirimin e rrethinavetë Raqqa-s dhe izolimin e qytetit dhe së dyti me marrjen e tij nën kontroll”.
Njoftimi vjen ndërsa forcat irakiane të mbështetura nga amerikanët vazhdojnë luftimet në cepat lindorë të Mosulit. Zyrtarët kurdë thanë se dy fushatat nuk janë të koordinuara, por thjesht “të sinkronizuara mirë”.
Luftëtarët e ISIS po bëjnë rezistencë ndaj trupave irakiane me makina-bomba dhe pusi të dielën, duke mos lejuar avancimin e tyre në drejtim të bastionit verior në Irak. Major-gjenerali Maan al-Saadi, komandant në trupat elitë të kundër-terrorizmit në Irak tha për televizionin shtetëror se luftëtarët e ISIS kanë ndërmarrë më shumë se 100 sulme me makina-bombë në lagjet lindore të qytetit.
Shpërthime të ngjashme vranë të paktën 20 persona gjetkë në Irak.
Uashingtoni thotë se beteja për Raqqa-n do të përkojë pjesërisht me sulmin në Mosul, për shkak të shqetësimit se çdo vonesë mund të mundësojë ISIS ta përdorë atë si vend-nisje për sulme jashtë territorit.
“Na duhet të shkojmë për Raqqa-n, automatikisht do të jenë forcat lokale që do të çlirojnë Raqqa-n, edhe pse forcat franceze, amerikane e koalicioni do të ndihmojë me sulme ajrore për zhdukjen e ISIS”, tha ministri francez Le Drian për radio Europe 1.
“Mosul-Raqqa nuk mund të mos ndërlidhen pasi ISIS dhe territoret që ai ka pushtuar shtrihen në atë zonë”, tha ai.
Zyrtarët amerikanë kanë pohuar se largimi i ISIS nga Raqqa kërkon sfida më të ashpra politike sesa ofensiva në Mosul dhe kanë sugjeruar që faza fillestare të përfshijë izolimin e qytetit përpara se trupat të përpiqen të hyjnë në të.
Shtetet e Bashkuara thonë se po përpiqen të punojnë për ribalancimin e përzierjes etnike në forcat kurdo-arabe që përfshijnë gjithashtu edhe turkmenët dhe luftëtarë arabë, pasi është e ditur se sulmi kurd mbi Raqqa-n do të ishte shumë jopopullor brenda qytetit dhe diçka që kurdët nuk do ta dëshironin.
Në një mesazh sfidues të dielën, presidenti turk, Recep Tayyip Erdoğan, akuzoi Europën se po mbështet terrorizmin me ndihmën që i jep PKK-së dhe tha se nuk kujdesej aspak nëse Europa e quan diktator kur ai përdor dorë të fortë mbi grupet militante kurde dhe simpatizantë të tyre.
“Europa si e tërë po mbështet terrorizmin. Edhe pse ata e deklarojnë PKK-në një organizatë terroriste, kjo është e qartë… ne shohim sesi PKK mund të veprojë lirshëm dhe rehat në Europë”, tha Erdoğan në fjalimin e transmetuar në televizion.
“Nuk më intereson nëse ata më quajnë diktator apo me emra të tjerë, ng njëri vesh më hyn, nga tjetri më del. Ajo që ka rëndësi është se si më quan populli im”, tha ai.
Përgatiti: Juli Prifti – /tesheshi.com/
