Miqësorja mes Gjermanisë dhe Finlandës ka qenë ndeshja e fundit për Schweinsteiger-in në fushë si lojtar i përfaqësueses.
Lojtari që e vijon aktivitetin në Angli, te Mançester Junajtedi, u aktivizua mbrëmë për herë të 121-të me përfaqësuesen gjermane, duke u tërhequr si lojtari i katërt me më shumë paraqitje me Gjermaninë.
Ai e la fushën në minutën e 67-të, duke marrë përshëndetje të jashtëzakonshme nga mijëra vetë që kishin ardhur për të parë lamtumirën e tij.
32-vjeçari ishte pjesë e ekipit gjerman që fitoi Kupën e Botës dy vite më parë në Brazil.
Schweinsteiger e bëri debutimin me përfaqësuesen gjermane në vitin 2004, në një takim miqësor me Hungarinë, për ta mbyllur këtë kapitull po në një miqësore.
Mesfushori, ish-kapiteni, u pa të lotonte gjatë ceremonisë për të. “Do të thotë shumë që ju jeni këtu sot,” u tha ai të pranishmëve në stadium. “Ka qenë një nder të luaj për ju!”
Miqësorja mes Gjermanisë dhe Finlandës përfundoi 2-0, me golat të shënuar në pjesën e dytë nga Meyer dhe Ozil. /tesheshi.com/
