Ish-mesfushori i Bajernit të Mynihut dhe i Gjermanisë ka arritur marrëveshjen me Chicago Fire, për ta vijuar kështu pjesën e mbetur të karrierës në Major League Soccer.
Lajmin e ka bërë të ditur Chicago Tribune, që saktëson se Schweinsteiger ka nënshkruar një kontratë njëvjeçare, me të drejtë përtëritje. Ai do të përfitojë 4.5 milionë dollarë gjatë këtij viti, ndërsa mund t’i bashkohet klubit të ri që prej javës së ardhshme.
Schweinsteiger u afrua te Man. Junajtedi në 2015-n, pasi e kishte kaluar pjesën më të suksesshme të karrierës së tij tek Bajerni i Mynihut.
I gjendur në vështirësi prej ardhjes së Mourinho-s në krye të ekipit anglez, për gjermanin qenë të pakta aktivizimet gjatë kësaj kohe. Edhe pse iu bë e qartë se duhej të largohej, 32-vjeçari zgjodhi fillimisht të qëndronte te Mançesteri.
Bastian Schweinsteiger shkon në një klub me paraqitje jo të mira. Një fitore, një barazim dhe një humbje ka klubi i ri i gjermanit në nisje të sezonit të ri të MLS-së. /tesheshi.com/
