“Nuk mendoj se Schweinsteiger do të luajë këtë sezon; mendoj se bëhet gati sezonin tjetër,” ka deklaruar trajneri Van Gaal për faqen elektronike të Mançester Junajtedit.
Mesfushori 31-vjeçar gjerman këputi një ligament të gjurit ndërsa përgatitej në mars për miqësoren e vendit të tij ndaj Anglisë.
Ai u transferua në verën e shkuar te Mançester Junajtedi pas më shumë se një dekade te Bajerni i Mynihut. Bastian Schweinsteiger ka luajtur gjithsej në 31 ndeshje gjatë këtij sezoni me “djajtë e kuq”, me paraqitjen e tij të fundit më 20 mars, në derbin ndaj Mançester Sitit.
Por Van Gaal e ka lënë të hapur mundësinë që futbollisti të luajë për Gjermaninë në Europianin e Francës.
“Mbase ai bëhet gati për Kampionatin Europian, nuk mund ta parashikoj.”
Gjithsesi, holandezi e sheh këtë si diçka pozitive, “Eshtë e mundur, por kjo është prapëseprapë në favorin tonë, sepse ai do të jetë gati për sezonin e ri.”
Për futbollistin gjerman ka patur pritshmëri të mëdha që kur nënshkroi një kontratë trevjeçare me Mançester Junajtedin, por ai nuk është ngjitur asnjëherë në nivelin në të cilin jemi mësuar ta shohim te Bajerni i Mynihut.
Mançester Junajtedi po ashtu ka zhvilluar një sezon me luhatje të mëdha. Skuadra gjendet në vend të pestë në renditjen e Premier Ligës, teksa lufton për ta mbyllur kampionatin në katër vendet e para. /tesheshi.com/
