Vendi bask, një provincë autonome me 2.2 milion banorë në Spanjën veriore, dëshiron të ketë ekipin e tij kombëtar të futbollit për të garuar në kualifikimet për Kupat e Evropës dhe Botës.
Federata Baske e Futbollit u paraqiti të martën një kërkese organizatave UEFA dhe FIFA në Zvicër.
“Eshtë një kërkesë zyrtare në të cilën ne kërkojmë pranim si anëtar i plotë. Kërkesa u shoqërua me të gjithë dokumentacionin ligjor dhe administrativ që mbështet kërkesën tonë,” tha Shoqata e Futbollit Bask në një deklaratë të lëshuar të mërkurën, siç raportohet nga scsport.ba.
FIFA në selinë e saj në Cyrih dhe UEFA në Nyon, konfirmuan se morën një kërkesë nga Shteti Bask.
“Eshtë një qëllim legjitim dhe absolutisht i arritshëm nga pikëpamja ligjore. Kjo konfirmon anëtarësimin në (UEFA dhe FIFA) dhe territoreve të tjera evropiane që nuk janë shtete të pavarura, por kanë një histori të gjatë të ekipeve të tyre kombëtare, me ose pa ligën e tyre,” tha deklarata.
Përfaqësime të tilla janë, për shembull Skocia, Uellsi dhe Irlanda Veriore si pjesë e Mbretërisë së Bashkuar, si dhe Ishujt Faroe nën sovranitetin e Danimarkës. Në vitet e fundit, Kosova dhe Gjibraltari, i cili është territor britanik në jug të Spanjës, kanë ekipet e tyre kombëtare. Por në shembujt që sjellin, te Kosova, nuk kanë marrë në konsideratë faktin se kjo e fundit është shtet i pavarur.
Federata Baske e Futbollit dëshiron të arrijë të njëjtën gjë në marrëveshje me Federatën Spanjolle të Futbollit.
“Ne kemi informuar Federatën Spanjolle për dëshirën tonë për të hapur negociata që do të rezultonin në një marrëveshje që do të na jepte autorizimin zyrtar të Federatës Spanjolle të Futbollit,” tha deklarata.
Por Federata Spanjolle e Futbollit ende nuk ka dhënë komente për këtë.
Për ta bërë të dukshme kërkesën e tyre, baskët tashmë kanë krijuar një ekip kombëtar dhe kanë luajtur me të në disa ndeshje miqësore, të cilat nuk ishin nën juridiksionin e UEFA dhe FIFA.
Vendi bask mundi Kosta Rikën 2-1 muajin e kaluar në një ndeshje të luajtur në qytetin e vogël Eibar. Para kësaj, ajo luajti një ndeshje me Panamanë në 2019 dhe Venezuelën në 2018.
Përgjatë dekadave, baskët kanë luajtur një rol të rëndësishëm në ekipet kombëtare të Spanjës, por edhe të Francës, pasi që një pjesë e vendit bask ndodhet në kufi mes tyre. Midis futbollistëve të famshëm ishin Andoni Zubizarreta, Julen Guerrero, Xavi Alonso, Gaizka Mendieta dhe Bixente Lizarazu. /tesheshi.com/
