Ndarja e re territoriale dhe krijimi i bashkive të mëdha “gëlltisin” një numër të madh të punësuarish në shtet. Sipas projektit që pritet të zbatohet, në strukturat e reja nuk do të ketë as këshilltarë komunash, as sekretarë të këshillave të komunave, as nënkryetarë komunash dhe as shoferë të kryetarëve të komunave.
Madje, sipas drejtorit të Përgjithshëm të Agjencisë për Zbatimin e Reformës Territoriale, Artan Shkëmbi, nuk do të ketë më as policë komune dhe as drejtorë finance e as drejtorë urbanistike. Këto funksione nuk janë më të njësive administrative, por të bashkisë së madhe.
Në momentin e konstituiimit të të gjithë këshillave bashkiakë të dalë nga zgjedhjet locale të 23 Qershorit, ndryshon edhe struktura e punësimit.
“Eshtë e natyrshme që disa persona do të shkurtohen nga administrata për shkak të këtij riorganizimi”, pohon Shkëmbi.
Megjithatë, ai nënvizon se do të zbatohet ligji për të gjithë punonjësit me kontratë dhe për nëpunësin civilë. /tesheshi.com/
