Komisioni Europian ka zgjidhur qesen këtë të hënë, duke miratuar një mbështetje financiare për shtetet anëtare, të tilla si Italia dhe Greqia, që po përballen me një vërshim të pandërprerë emigrantësh.
Shuma e miratuar si ndihmë për gjashtë vite është 2.4 miliardë euro, dhe pjesën e luanit do ta marrë Italia, së cilës i janë taksur afër 560 milionë euro. Përfituesi i dytë më i madh i kësaj ndihme financiare është Greqia, që do të marrë 473 milionë euro.
Dimitris Avramopulos, zyrtari më i lartë i BE-së për emigracionin, u shpreh kështu në një deklaratë, “Shtetet anëtare po përballen në ditët e sotme me sfida të papara në fushat e emigracionit dhe sigurisë, dhe Komisioni po merr masa në frymën e solidaritetit.”
Ky vit ka qenë i vështirë për një sërë vendesh europiane, ndërsa mijëra emigrantë kanë marrë rrugët nga Lindja e Mesme dhe Afrika për të gjetur strehë në kontinentin e vjetër. Veç Italisë dhe Greqisë, që kanë shërbyer si zgjedhje e parë e emigrantëve për të vënë këmbën në Europë, Franca dhe Britania po ashtu janë trazuar nga turmat e refugjatëve që përpiqen të kalojnë ilegalisht në Angli nëpërmjet Eurotunelit.
Kështu, një pjesë e ndihmës do të shkojë për Francën dhe Britaninë.
Sipas zëdhënëses së Komisionit Europian, Natasha Berthaud, Mbretëria e Bashkuar e ka marrë tashmë lëvrimin e parë të financimit të vet, ndërsa fondi për programin kombëtar francez do të lëvrohet së shpejti.
Komisioni Europian do të miratojë gjatë këtij viti dhe 13 programe shtesë, për t’u vënë më pas në zbatim nga shtetet anëtare.
Sipas Kombeve të Bashkuara, vetëm në këta shtatë muaj kanë mbërritur në Europë nëpërmjet Mesdheut më së paku 100.000 emigrantë. /tesheshi.com/
