Vende të tjera të Bashkimit Europian kanë ndjekur shembullin e Gjermanisë dhe kanë vendosur kontrolle në kufijtë e tyre për të përballuar krizën e refugjatëve. Fillimisht, Austria njoftoi vendosjen e trupave ushtarake në kufij, pak pasi Gjermania riktheu kontrollet në kufirin e saj me Austrinë.
Por, tashmë, masa të ngjashme kanë marrë edhe Sllovakia e Holanda që thanë se do të përforcojnë sigurinë në kufijtë e tyre.
Hungaria prej mesnatës nis kontrolle të forta kufitare, ndërsa në Bruksel, ministrat e Brendshëm të BE-së kanë nisur diskutimet për krizën e refugjatëve në një takim urgjent.
Lëvizja e lirë mes vendeve të zonës Shengen duket se po sfidohet nga vetë shtetet anëtare të Bashkimit Europian, ndërsa fluksi i refugjatëve ka vënë me shpatulla për muri politikanët që nuk arrijnë të gjejnë një përgjigje të përbashkët. /tesheshi.com/
