Romana Vllahutin, përfaqsuesja e Zyrës së BE-së në Tiranë, e superakuzuara e qarqeve mediatike të opozitës për abuzime financiare me postin, ka folur këtë të enjte pas një heshtjeje që është lexuar si një sfidë dhe injorim ndaj akuzave. E pranishme në prezantimin e sondazhit “Besimi në qeverisje 2016”, ajo foli për reformën në Drejtësi dhe kundërshtarë e saj, duke lënë të nënkuptohet se për kë është fjala
“2 vite më parë kishte shumë pak besim tek gjyqësori. Kemi 2 vite që luftojmë për të rritur besimin e qytetarëve te drejtësia. Hapi i parë i reformës në drejtësi, nisi dje me ONM. Qytetarët shqiptarë kanë besim tek institucionet e BE. Dje kanë qenë më shumë se 100 aplikantë për ONM. Kundërshti ka patur vetëm nga ato që kanë interesa personale”, tha e besuara e Brukselit në Tiranë. Por vetëm kaq. Javët e fundit, Vllahutin është akuzuar për blerjen e një vile të shtrenjtë në lagje rezidenciale në periferi të Tiranës, por vetë ajo nuk i është përgjigjur akuzave.
E vendosur krah ambasadorit Lu duke i investuar fort, fillimisht në votimin me unanimitet të reformës e më pas zbatimin e saj, Vllahutin është përballur parreshtur me akuza nga media pranë opozitës. Por siç ka lënë të nënkuptuar në fjalinë e fundit të deklaratës së saj, ato përkthehen si kundërshti nga ata që për interesa personale nuk e duan reformën në Drejtësi. /tesheshi.com/
