Banorët e njësisë administrative Mbrostar në Fier kanë rinisur sërish protestat kundër ndërtimit të impiantit të mbetjeve. Pas pushimit të tubimeve në rrugët nacionale, këtë herë ata kanë kundërshtuar vendimin e këshillit bashkiak të Fierit, që parashikon ngritjen e landfillit, pranë fshatrave Kraps dhe Plykë. Banorët e këtyre zonave janë shprehur kundër këtij projekti, pasi sipas tyre ndikon drejtëpërdrejtë në shëndetin e tyre. “Po na helmojnë fëmijët, fabrika do të jetë jo më shumë se 1.5 km larg shtëpive”, tha i irrituar njëri prej protestuesve.
Ata kanë paralajmëruar se do të përshkallëzojnë protestat, deri në bllokimin e autostradës, me qëllim që investimi të mos realizohet pranë banesave të tyre.
Vendimi i këshilltarëve u mor disa ditë më parë, një javë pasi u anullua një tjetër vendim që përcaktonte fshatin Portëz, si vend për fushën e plehrave. Protestat e vazhdueshme të fshatit detyruan administratorët të zhvendosnin planin e ndërtimit të impiantit, në një tjetër territor të Fierit, por duket se edhe në këtë rast planet e tyre nuk do të shkojne siç janë parashikuar./tesheshi.com
