Partia Demokratike edhe pse në opozitë, që prej datës 18 maj është pjesë e qeverisjes me 6 ministrat teknikë, një zv/kryeministër dhe disa drejtorë të rëndësishëm. Por, për shkak të një premtimi të dhënë në atë takim disaorësh mes Lulzim Bashës dhe Edi Ramës kjo “bashkëqeverisje” do të vijojë edhe pas rezultatit të qartë të 25 qershorit, ku Partia Socialiste fitoi mandatet e nevojshme për të qeverisur e vetme.
Falenderimi epik i Ramës për kundërshtarin e tij Basha në sheshin Skënderbej se “vuri Shqipërinë para partisë” nuk do të mbetet vetëm tek fjalët, pasi “shpërblimi” për marrëveshjen që i dha fund krizës politike 3-mujore dhe u pasua nga zgjedhje në klimë mirëbesimi, do të vijojë edhe pas zgjedhjeve.
Edhe pse Rama nuk ia ka nevojën një aleati për të bërë qeverinë, ku PD-ja nuk ishte përjashtuar prej tij, i duhet një aleat për të kryer reformat e mëdha kushtetuese dhe atë në Drejtësi, që të afrojë integrimin e vendit në BE. Dhe këtë aleancë ai e kërkon tek Basha dhe PD-ja.
Si shenjë mirëbesimi mes palëve, demokratët do të kenë një derë hapur për t’u punësuar në administratën e re, një mundësi kjo vetëm për të punësuar disa njerëz, por për të rritur forcën e kësaj partie në rrethe, pas një goditje të fortë që mori me humbjen e zgjedhjeve dhe copëtimin e strukturave lokale.
Burime nga PD-ja bën të ditur për tesheshi.com se PD do të marrë në heshtje disa drejtori në nivele të dyta nëpër qarqe të ndryshme të vendit, si një “shpërblim” për reformat që pritet që dy partitë e mëdha të vazhdojnë pas muajit shtator, ku do të krijohet edhe qeveria e re, e cila për herë të parë pas disa mandatesh do ecë vetëm me “një timon”.
Ideja se “jemi në pushtet dhe pse jemi në opozitë” përflitet fort në bazën demokrate, kryesisht në radhën e mbështetëse të Bashës.
Gjatë dy muajve të “bashkëqeverisjes” ministrat teknikë të emëruar nga Basha bën dhjetra emërime në nivele të dyta dhe të treta të administratës, shumica e të cilëve nuk do të preken edhe pas largimeve të ministrave.
Vetëm ministri i ri i Drejtësisë, Gazmend Bardhi ka bërë mbi 10 emërime drejtorësh të rinj në burgje dhe në zyrat e regjistrimit të pasurive.
Po siç ndodh në Shqipëri, një vend drejtori hap rrugën për punësime të reja duke krijuar rrjetin e tij dhe influencën e partisë në atë zonë.
A do të jetë kjo një lloj “tepsie” e re, të cilën Rama premtoi që do t’a zhdukte duke akuzuar aleaten e tij LSI-në se kishte abuzuar me zyrat e shtetit?
Kështu duket, por burime nga PS-ja argumentojnë ndryshe. “Në kuadër të reformimit të administratës çdo punësim nuk do të shihet me ngjyrat partiake, por në bazë të meritokracicë”- thanë burimet socialiste duke aluduar se kjo nuk pengon rrugën e punësimit as demokratëve të deklaruar dhe të angazhuar në PD.
Sfida më e madhe që ka PD-ja pas përfundimit të zgjedhjeve në parti është riformatimi dhe forcimi i strukturave lokale të saj, të cilat gati u shkatërruan në disa rrethe, pikërisht për shkak të lojës me “punësimet”.
Shumë krerë lokalë të PD-së, ish-drejtorë të saj dhe njerëz me influencë në zona të caktuara, kaluan “ylberin” politik dhe u bënë me LSI-në dhe PDIU-në për shkak të një vendi pune në “tepsinë” e pushtetit.
Gjithashtu, dhënia e një dore nga ana e Ramës për kundërshtarin politik, për “mikun e ri të orëve të vona” siç e quan ai Bashën, do të tentojnë krijimin e dy poleve në politikë, që ishte dhe synimi i marrëveshjes së 18 majit, nga e cila u sulmua nga të dyja krahët LSI-ja, e cila ka luajtur rol kyç për ndërtimin e qeverive në dy mandatet e fundit./tesheshi.com/
