Bashkëpunonte me DEA-n, vritet në Ekuador Iler Hidri, bosi shqiptar i kokainës; dëshmitë do preknin fijet e politikës në Tiranë

Një ngjarje e ndodhur në Ekuadorin e largët ka shqetësuar shumë DEA-n amerikane, e cila ishte thuajse në përfundim të një superoperacioni për të kapur dhe zbuluar një rrjet të madh të trafikut të kokainës Ekuador-SHBA-Europë-Shqipëri, ku besohet se ndodhet koka e këtij narkotrafiku.

Një hetim i nisur prej disa vitesh dhe i udhëhequr nga agjencia e njohur amerikane e luftës kundër megarrjeteve ndërkombëtare të drogës, ka arritur të zbulojë një organizatë të fuqishme trafiku, e cila i pastron prej vitesh paratë në Shqipëri dhe që ka lidhje të fuqishme me grupe biznesi, madje edhe lart në politikën shqiptare.

Dyshimet prej kohësh kanë nisur të mblidhen me prova, dhe amerianët kanë arritur të depërtojnë në disa prej organizatave më të fuqishme të shqiptarëve në Amerikën Qendrore, të cilat sipas dyshimeve të DEA-s kanë investuar edhe në tregun mediatik shqiptar.

Një prej anëtarëve të kësaj organizate, Iler Hidri, një 36-vjeçar i njohur për ambientet e trafikut të furnizimit me kokainë të Europës, por edhe Shqipërisë, i cili kishte negocuar me DEA-n për t’u bërë bashkëpunëtor i drejtësisë, është vrarë dje në mesditë në qytetin Guayaquil, ndërsa ndodhej pranë tregut të madh, ku ishte parashikuar një shkëmbim shumë i rëndësishëm si pjesë e operacionit të DEA-s.

Siç duket, njerëzit e rëndësishëm të organizatës së trafikut kanë zbuluar bashkëpunimin e tij me amerikanët dhe e kanë ekzekutuar me plumb pas shpine. Një burim shumë i rëndësishëm në një nga agjencitë shqiptare ligjzbatuese, i tha tesheshi.com se policia speciale ekuadoriane dhe DEA, thuajse kanë arritur në identifikimin e vrasësit të Iler Hidrit dhe sipas të dhënave paraprake ai është një shqiptar i cili ka mbërritur në Ekuador të enjten mbrëma, me linjë direkte nga Madridi.

DEA pritet të ndërhyjë fuqishëm këto ditë nëpërmjet Interpolit në një operacion gjigand ë disa shtete të Europës dhe në Shqipëri, për të kapur pjesëtarët më të rëndësishëm të kësaj organizate.

Lajmet që vijnë nga Ekuadori flasin se vrasësi është shumë pranë arrestimit dhe mësohet se ka shumë prova për të dokumentuar veprimtarinë e këtij rrjeti kriminal.

Bëhet fjalë për një rrjet të madh, i cili e ka fushën më të madhe të veprimit në Spanjë, ku importon kokainën nga Amerika Latine dhe më pas e shpërndan atë në të gjithë kontinentin.

Sipas të dhënave që vijnë nga agjencitë ligjzbatuese, Hidri ishte pjesë e kësaj organizate të madhe, të kapur në tetorin e këtij viti në Barcelonë, e që më pas së bashku me disa kolegë të tij ka pranuar bashkëpunimin me drejtësinë.

Hidri ka qëndruar disa muaj në burg dhe vetëm pak kohë më parë është liruar si pasojë e një marrëveshjeje me DEA-n, e cila po udhëheq prej një viti operacionet antidrogë në Ballkan.

Në muajin tetor, brenda një dite u kapën rreth 70 baronë shqiptarë të drogës, të cilët më pas kanë rrëfyer se ata janë vetëm “kapitenë”, pasi “gjeneralët” dhe “konsujt” ndodhen në Tiranë.

Ky operacion u krye thuajse njëkohësisht me aksionin që nxori në pah rastin “Klement Balili”, i cili tronditi politikën shqiptare, por që tani çuditërisht s’po e përmend kush.

Tesheshi.com ka bërë të ditur që në fillim se Balili ka hyrë tashmë në lojën e shërbimeve, ku mendohet se është përpunuar, por ngaqë operacioni është në veprim e sipër të gjitha detajet  për të mbahen sekret.

Në operacione të tilla janë shumë të rrezikshme rrjedhjet e informacionit, pasi një gabim i vogël prish gjithçka, siç ndodhi dje me Iler Hidrin.

Në Tiranë ndodhet një celulë e fuqishme e DEA-s, e cila po ndjek në vazhdimësi lëvizjet e klasës drejtuese të trafikut, që mendohet se ka lidhje shumë të forta në oligarkinë e politikës shqiptare.

Pikërisht edhe vonesa e reformës në drejtësi, pra instalimi i Byrosë Kombëtare të Hetimit dhe Prokurorisë Speciale, ka patur për qëllim pengimin e operacionit të madh të kapjes së kokave të trafikut; kjo pasi është arritur që të dokumentohet edhe skema e pastrimit të parave.

Drejtoria e Pastrimit të Parave në kryeministri ka dokumentuar 411 raste pastrimi parash, hetimet ndaj të cilave pritet të ndiqen paralelisht me operacionin e trafikut të drogës, për të gjetur tangenten dhe përbashkimin e parave në Tiranë. Dhe rruga e tyre do të çojë natyrisht në atë që tanimë nuk është thjeshtë dyshim: kupolën e lartë të kësaj mafieje.

Madhe për të përforcuar këtë përpjekje që po mbështetet nga SHBA e BE, kanë qenë edhe vizitat në Tiranë e senatorit John Mçain, grupit të senatorëve që erdhën një muaj më parë, por mbi të gjitha vizita e zyrtarit të lartë të DASH, Hoyt Brian Yee, e cila ka shkaktuar një tronditje të nivelit të lartë.

E tani pritet të shkaktojë një ortek të vërtetë në ditët që vijojnë. Kryesisht pas zgjedhjeve. /tesheshi.com/