Kryeministri izraelit, Benjamin Netanjahu kritikoi ashpër homologun e tij polak për deklaratën se hebrenjtë ishin mes keqbërësve të Holokaustit.
Ai tha se komentet e Mateusz Morawiecki në konferencën e Sigurisë në Mynih ishin “skandaloze” dhe tregojnë paaftësi për të kuptuar historinë.
Konflikti i ri mes dy vendeve vjen vetëm pak javë nga hyrja në fuqi e një ligji në Poloni që e bën të jashtëligjshme akuzën ndaj kombit apo shtetit polak për përfshirje në krimet naziste.
Kryeministri Morawiecki iu përgjigj një pyetjeje nga një gazetar izraelit në Mynih nëse dikush që thotë se polakët ishin bashkëpunëtorë në Holokaust, do të konsiderohej kriminel sipas ligjit të ri.
“Eshtë tepër e rëndësishme të kuptojmë së pari, që sigurisht nuk do të jetë e ndëshkueshme, nuk do të shihet si krim nëse thuhet se ka pasur keqbërës polakë sikundër hebrenj, rusë apo ukrainas e jo vetëm keqbërës gjermanë”, tha ai. /tesheshi.com/
