Kreu i PD-së Lulzim Basha që udhëhoqi opozitën në zgjedhjet e fundit e ka nisur nga qyteti i Kavajës turin e takimeve me bazën duke kërkuar besimin për të vijuar të jetë kryetar i kësaj partie edhe pas humbjes së madhe.
Zgjedhja e Kavajës nuk është bërë rastësisht, pasi në fakt ishte i vetmi qytet që i dha një fitore PD-së dhe Bashës me fitoren e kryebashkiakut të ri, i cili u zgjodh gjatë zgjedhjeve të pjesshme vendore në të njëjtën ditë që bëhej votimi parlamentar në të gjithë vendin.
Basha tha para simpatizantëve se është koha për të marrë përgjegjësi dhe për të mësuar nga ajo çfarë ndodhi në Kavajë, ku bashkimi i të gjithë demokratëve solli fitoren e bashkisë përballë krimit dhe parave të drogës.
“Nuk kam ardhur vetëm për t’ju uruar dhe as për të marrë vetëm duartrokitjet tuaja sepse kjo është ora për të marrë përgjegjësitë e mia. Është ora për të marrë të gjithë përgjegjësitë e mia për të gjithë vendimmarrjen, për të gjykuar bashkë me ju, a bëmë gjithçka që mundëm? A qëndruam apo jo fuqishëm në kauzat që besonim, në kauzat e drejta të shqiptarëve; me dekriminalizimin, me luftën kundër drogës, me luftën për një drejtësi të pakapur e të panënshtruar politikisht dhe me luftën për zgjedhje të lira e të ndershme? Dhe nëse po, le të mos e konsiderojmë këtë fundin e një beteje, por njësoj si në vitin 1991 ta konsiderojmë stacionin drejt betejës tjetër, betejës përfundimtare për të rrëzuar një herë e mirë këtë regjim dhe për t’i rikthyer shqiptarëve shpresën në vend të frikës”, theksoi Basha.
Po sot Basha ishte në Lezhë bashkë me rivalin Eduart Selami për të prezantuar platformat e tyre si kandidatë për kryetar të PD-së./tesheshi.com/
