Largimin e kreu të Policisë së Shtetit Haki Çako, kreu demokrat Basha e ka shfrytëzuar për formulime shtesë në akuzat e tij ndaj Ramës. Në stilin e njohur të zbulimit të konspiracioneve politike në radhët e aktorëve të mazhorancës, Basha serviri në Kamëz, në një takim të radhës në parapërgatitje për protestat e paralajmëruara, atë që e cilësoi si pakti Rama – Çako.
“Edi Rama ka garantuar Haki Çakos se pavarësisht qenies në krye të Policisë së Shtetit kur vendi u mbulua me drogë, pavarësisht së qënit leva e Saimir Tahirit, kur policia u kthye në një organizatë kriminale, pavarësisht veprimeve të paligjshme me përgjuesit që përgjonin opozitën, diplomatët e huaj dhe çdo kundërshtar të vërtetë apo të perceptuar të qeverisë, mund të ikë i lirë në punën e tij. Nga ana tjetër Haki Çako do ta mbyllë gojën për aferat e tmerrshme kriminale dhe korruptive që implikojnë drejtpërdrejt Edi Ramën dhe njerëzit e tij më të ngushtë në qeveri dhe në Partinë Socialiste. Por, dua t’jua them sot ju dhe çdo shqiptari. Ky pakt mafioz nuk do ta ketë jetën e gjatë”, tha Basha.
Nga ana e tij, ish-kryepolici Çako e ka konsideruar largimin e tij si diçka normale, brenda rregullit që çdo gjë e ka një fillim e një fund. /tesheshi.com/
