Kritikat e Ramës ndaj lidershipit kosovar për refuzimin e Shengenit rajonal, kreu demokrat Basha i ka përjetuar si diçka të rëndë, ndaj për këtë e ka quajtur si “gjuhë rrugaçërore”, deri në pikën e kërkimit ndjesë.
“Dënoj sulmin rrugaçëror të Edi Ramës kundër liderëve politikë të Kosovës dhe shpreh ndjesë në emër të çdo shqiptari për këtë akt të papranueshëm! Gjuha e urrejtjes ndaj institucioneve të Kosovës është akt i denjë vetëm për një peng të antishqiptarizmit si Edi Rama!”, shkruan Basha.
Nga ana tjetër, edhe vizionin bashkëpunues të Ramës me Vuçiçin në kuadër rajonal, nxitur dhe nga ndërkombëtarët, Basha e ka përkthyer si vasalitet.
“Kosova është shtet i pavarur dhe Shqipëria ka detyrimin të promovojë dhe respektojë pavarësinë e Kosovës dhe institucionet e saj. Koha e vasalitetit të autokratit të korruptuar të Tiranës ndaj armiqve dhe kundërshtarëve të pavarësisë së Kosovës do të marrë fund shumë shpejt!”, shkruan Basha.
Kujtojmë se një ndër frazat kritike të Ramës qe: “Nuk mund të urdhëroj, kam detyrën t’ju them: jeni gabim vëllezër. Kosova nuk ka nevojë për një garë të brendshme. Kosova ka gjëra shumë të thjeshta për të bërë”, tha Rama. /tesheshi.com/
