Kreu demokrat Basha vijon të promovojë idenë se 30 qershori qe një fitore e madhe opozitare, pasi atë ditë, siç thotë ai, Rama u braktis masivisht. Në një tur që ka ndërmarrë nëpër Shqipëri, duke i mëshuar pikërisht tezës së tij se 30 qershori qe një bojkot masiv, përkthyer kjo sipas tij në një refuzim ndaj qeverisë, Basha ishte në Berat e Kuçovë, ku ndër të tjera vlerësoi dhe aktin e djegies së mandateve.
“Pa vendimet e mëdha që morëm, duke nisur me djegien e mandatave, as vetëdijësimi i shqiptarëve nuk do të rritej, as kurajo nuk do të ishte në këto nivele. Sepse më 30 qershor është bërë protesta më e madhe e të gjithë protestave.
Nuk u bë në një shesh, por u bë në të gjithë Shqipërinë njëkohësisht.
E vetmja votë e pastër e 30 qershorit është vota e atyre që nuk dolën. Mesazhi është ai që është bërë refren deri edhe për fëmijët: Rama ik.
Raporti i ODIHR është vula më e zezë që kanë marrë ndonjëherë zgjedhjet në Shqipëri dhe Ballkan”, tha Basha.
Kreu i opozitës preteëndon se 30 qershori u bojkotua nga 80 përqind e shqiptarëve, duke iu referuar të gjithë trupës votuesve në terma zyrtarë, ndërsa mazhoranca thotë se ajo ka marrë pa asnjë cenim votat e saj, madje diç më tepër. /tesheshi.com/
