“Ndjehem fajtor, si deputet, politikan, kryetar i PD-së, që kemi lënë shumëçka për gati tre dekada për të dënuar komunizmin, për të penguar eksponentë të lartë komuniste dhe autorët e krimeve të komunizimit të mos ndikojnë më në jetën shoqërore të vendit. Unë ndjehem i turperuar që pas 70 vjetësh jam në një Kuvend që drejtohet nga ajo pjesë e asaj klike kriminale dhe që ky vend të ketë ende në krye të institucioneve, njerëz të mësuar nga Enver Hoxha”.
Kështu u shpreh kreu i PD-së, Lulzim Basha, gjatë fjalës së mbajtur në seancën e posaçme parlamentare, me rastin e 70 vjetorit të ekzekutimit të deputetëve nga regjimi komunist i Enver Hoxhës.
Basha u shpreh se ne duhet të gjejmë dhe të identifikojmë të gjitha eshtrat e viktimave të komunizmit, të nderojmë martirët e pluralizmit shqiptar, të tregojmë krimet e komunizmit dhe historinë tragjike se si një popull i tërë ra në kthetrat e komunizmit, t’u presim rrugën njëherë e mirë drejtuesve të lartë komunistë nga drejtimi i vendit dhe të ndalojmë përdorimin e simboleve komuniste.
Ai bëri me dije se, PD do të kërkojë që në buxhetin e vitit të ardhshëm të përfshihet një fond për dokumentimin e historisë së krimeve komuniste.
“Historia e dhimbshme e diktaturës nuk duhet të përsëritet kurrë më. Ne duhet ta ndalojmë me çdo kusht e çdo çmim këtë gjë”, tha Basha.
Në fjalën e tij, kreu demokrat theksoi se 70 vjet më parë, regjimi barbar i Enver Hoxhës pushkatoi grupin e fundit të deputetëve opozitarë që kishin mbetur në këtë sallë. “I vrau sepse mendonin ndryshe dhe nuk u pajtuan me vdekjen e pluralizmit. Grupi i deputetëve dhe me dhjetra bashkëvuajtës të tyre ishin ata që nuk iu bashkuan klikës së dhunshme komuniste. Para tyre ishin burgosur dhe dhunuar elitat: inxhinjerë, profesionistë të shkëlqyer. U dënuan pa gjyq ose me gjyqe farsë. U vranë në emër të popullit me moton “Drejtësia është nder i partisë”. Eliminimi i tyre varrosi çdo lloj lirie politike në Shqipëri dhe çdo lloj desidence. Pas tyre, salla e të ashtuquajturit Kuvendi Popullor u mbush me kriminelë dhe gjakatarë e shërbëtorë të pushtetit personal të Enver Hoxhës”, tha Basha. /tesheshi.com/
