Kryedemokrati Basha ka vijuar të denoncojë atë që pak ditë më parë e përfshiu dhe te aktet kriminale të kreut të mazhorancës: heqjen e ndihmës ekonomike për qindra familje.
Risi ka qenë fakti se në lajmin e shpëndarë nga PD mbi një vizitë të Bashës në disa familje kavajase, sillet dialogu mes tij dhe kryefamiljarëve.
E në mesin e frazave, haset dhe një pasthirmë e Bashës, vënë besnikërisht nga zyra e tij e shtypit. Bëhet fjalë për rastin kur kreut demokrat i del nga goja një “ëëë…”
Basha: Ai (Edi Rama) thotë që ju preferoni 60 mijë lekëshin e ndihmës në vend që të merrni 200-300 mijë lekë rrogë.
Kastriot Mihani: Ore vëlla, gjeje ku, të më ofrojë punë, atëherë po. Po nuk shkova me punu, le ta heqë ndihmën. Unë jam njeri që punoj kudo. Si e heq përkrahjen pa lidhje? Çfarë do të hanë kalamajtë? Kanë ikur kalamajtë pa bukë sot në shkollë.
Fatmira Shima: Jemi të gjithë copë -copë. Kështu jepet jepet e drejta, shkon Edi Rama e heq asistencën robve, iu heq bukën e gojës? Sa merrsha unë?! 16500 lekë, me atë do të mbaja familjen time, gocën që kam sëmurë, burrin që e kam çuar në azil nga zori. S’kam të ardhura fare. Edhe fëmijët i kam gjysëm robi.
Me bashkëshortin në burg për dhunë në familje, Liljana Eminaj rrit dy fëmijë të mitur.
Basha: Të hoqën nga lista pa e parë shtëpinë fare?
Liljana Eminaj: Asnjë s’erdhi.
Basha: S’të kanë dhënë asnjë shpjegim pse të hoqën ëëë? Po me çfarë jetoni tani, fëmijët me çfarë i mbani?
Liljana Eminaj: Del çuni me mbledh kanaçe.
Basha: Sa vjeç është çuni?
Liljana Eminaj: 13 është.
