Si pa dashur, kreu i PD-së Basha e ka konturuar qëllimin e fshehtë të protestës e cila shkon direkt tek Vetingu. Në një qëndrim të orëve të fundit, ai e ka artikuluar fort këtë proces duke thënë se se “ata që duan Vetingun janë me opozitën”.
“Ne nuk do të pranojmë kurrë një drejtësi të kapur. Ne do ndërtojmë republikën e re, e cila fillon me përgatitjen e zgjedhjeve të lira dhe të ndershme dhe pastaj e Vetingun e vërtetë. Ata që duan Vetingun janë me opozitën, ata që nuk e duan kanë vendosur të rreshtohen me republikën e bjetër dhe i pret i njëjti fat si republika e vjetër”, tha Basha në përfundim të fjalës së tij.
Ai gjithashtu ka sulmuar dhe disa shoqata të shoqërisë civile të cilat kanë ndërmarrë një fushatë për mbledhje firmash në përkrahje të miratimit sa më shpejt të Vetingut
“Disa shoqata janë thirrur për t’i dhënë një dorë ndihme qeverisë. Këto shoqata nuk mbrojnë interesin e shqiptarëve dhe interesin publikut. Ku ishin këto shoqata për dekriminalizimin, mbushjen e vendit më drogë, apo të vjedhjeve të vota? Këto shoqata nuk mbrojnë interesat e shqiptarëve, ata punojnë për interesat e tyre dhe paguhen me miliona për të mbrojtur pushtetin dhe ne i tregojmë me gisht si bashkëfajtorë të lidhur me krimin”, shtoi kreu demokrat. /tesheshi.com/
