Në mesazhin e radhës në FB, kreu demokrat Basha thotë se “Shqipëria ka aq shumë pasuri dhe mundësi natyrore, sa shqiptarët mund të jetojnë të gjithë në kamje. Ata duan vetëm lirinë, vetëm konkurencën e ndershme, që të prodhojnë dhe krijojnë me mundin dhe aftësinë e tyre”.
E sipas tij, vetëm ndryshimi i qeverisjes do bënte të mundur këtë realitet. Thënë ndryshe, ardhja e tij në pushtet.
“Ne do t’i hapim tregjet. Do të garantojmë konkurencën e lirë. Do të krijojmë një mjedis, ku të lulëzojë sipërmarrja private. Liria ekonomike do të sjellë punë. Liria ekonomike do të sjellë mirëqenie”, shkruan Basha.
Sipas tij, këtë kërkon shumica e shqiptarëve.
“Shumica absolute e shqiptarëve të vendosur dhe mendjendarë në betejën për largimin e Edi Ramës dhe regjimit të tij, duhet ta dijë se Partia Demokratike, opozita e bashkuar e ka dëgjuar dhe do t’i prijë aspiratës tuaj për ndryshim. Ky ndryshim nuk mund të jetë dhe nuk do të jetë çështje fjalësh, por veprash dhe garancish.
Së bashku ne do ta kthejmë këtë mazhorancë absolute të refuzimit të regjimit, mazhorancën absolute ‘Rama ik’, në mazhorancën kombëtare të ndryshimit të madh për çdo shqiptar”, shprehet i pari i opozitës. /tesheshi.com/
