Në një bashkëbisedimme median, në kundërpërgjigje ndaj kryeminsitrit Rama, kreu demokrat Basha tha se do mirëpriste një rol të faktorit ndërkombëtar në zgjidhjen e krizës, një ulje në tryezë, por jo me kundërshtarin e tij.
“Jam njohur këto 24 orë me qëndrimet e partnerëve ndërkombëtare. U kam komunikuar miqve ndërkombëtarë se mirëpres angazhimin e tyre për zgjidhjen e krizës politike në vend. PD dhe opozita kanë qenë dhe janë gati të përfshihen në një proces të vërtetë politik me ndihmën e partnerëve tanë ndërkombëtarë”, tha Basha duke shtuar: “Por Rama nuk mund të jetë kryeministër. Kjo është e panegociueshme. Nuk dëshiroj të jap detaje për komunikimin me faktorin ndërkombëtar, por në përgjigje të shprehjes publike të dëshirës për t’u angazhuar, PD-ja shpreh vullnetin dhe mirëpret vullnetin” tha ai.
Ndërkohë, Basha e mbrojti me forcë precedentin që po krijon, duke arsyetuar:
“E gjitha kjo po bëhet për t’u mos u përsëritur kriza të tilla. Nëse do kemi një qeveri që e merr pushtetin me krimin dhe asgjeson gjykatat dhe emëron në mënyrë të paligjshme kryeprokuroren, dhunon qytetarët dhe helmon me gaz, atherë ky do të jetë precedent. Patjetër që po, një fund i tillë e pret. Me në fund populli ka fuqinë për të thënë se sovrani jemi ne. Shqiptarët duhet ta festojnë një precedent të tillë”, theksoi kreu demokrat.
Ai paralajmëroi se protestat do vijojnë sërish. “Protestat do të jenë edhe më të mëdha edhe më të fuqishme. Nesër do të mbledh strukturat dhe do të bëj konsultimin me koalicionin për axhendën e protestave”, theksoi Basha. /tesheshi.com/
