Në një bashkëbisedim me studentë të Shkencave Politike, kreu demokrat Basha, ka bërë prezantimin e saj që konsiderohet një PD e re në funksion të një sistemi të ri politik.
Duke e konsideruar këtë tanishmin, si të kriminalizuar dhe të korruptuar, Basha tha se ndryshimi duhet nisur nga vetja.
“Ky është edhe thelbi i ndryshimeve që po nisim në Partinë Demokratike, që në Partinë Demokratikë të zgjedhurit të jenë produkt i drejtpërdrejtë i vullnetit të anëtarëve të Partisë Demokratike. Duke demokratizuar Partinë Demokratike, duke e bërë PD një parti totalisht të vlerave dhe të modelit europian ne së pari ndërtojmë një garanci për betejën që kemi përpara. Garancia është që PD me këto vlera siç i zbaton sot brenda shtëpisë, nesër do t’i zbatojë në qeverisje”, theksoi kryedemokrati.
Interesant është fakti se në këtë prezantim, si dhe që pas mbylljes së çadrës në maj të vitit të kaluar, Basha e ka lënë mënjanë dhe nuk e ka promovuar më tezën e “Republikës së Re”. Edhe ajo këtë mëtonte, sistemin e ri politik. /tesheshi.com/
