Kryetari i PD, Lulzim Basha vizitoi çadrën e protestës përpara Kryeministrisë, duke takuar dhe biseduar me aktivistët e pranishëm. Duke folur përpara tyre, ai premtoi se protesta ka një mbështetje në rritje jo vetëm mes njerëzve, por edhe nga ndërkombëtarët.
Basha tha se nga “sheshi i lirisë”, siç është pagëzuar tashmë nga protestuesit, do të shpallet fitorja e demokracisë së vërtetë, dhe do të rrëzohet demokracia fasadë e kryeministrit Rama.
“Konsensusi qytetar po rritet nga momenti në moment, mbështetja e partnerëve ndërkombëtarë po rritet për kërkesën tonë të drejtë. Zgjedhje të lira dhe të ndershme, zgjedhje me një qeveri që do garantojë votën e lirë të qytetarëve”, theksoi kreu demokrat.
Sipas tij, nuk ka kthim pas, ka vetëm ecje para drejt demokracisë. “Ne këtu do të flasim jo vetëm për problemet, por edhe për ëndrrat. Dje morëm vendimin e madhe për zgjedhje të lira dhe të ndershme pa Edi Ramën. Dita e dytë sapo ka nisur, mbështetja dhe besimi juaj janë garancia se fitorja po vjen dhe fitorja do të jetë e Shqipërisë”, theksoi Basha.
Fjalimi i tij në ditën e dytë të protestës që pritej me interes për të kuptuar synimet e selisë blu për vazhdimin e kësaj nisme, nuk ofroi, në fakt, ndonjë të dhënë të re sesi planifikon PD të mbajë në shesh qytetarët dhe përsa kohë. /tesheshi.com/
