Kreu demokrat Basha, i ndodhur në Slloveni në një aktivitet mbi sundimin e ligjit në vendet që kërkojnë integrimin në BE, kërkoi aplikimin në Shqipëri të të ashtuquajturit “Raporti Priebe”, i cili zë fill pak vite më parë në Maqedoni.
“Monitorimi më efektiv i reformave të Sundimit të Ligjit në vendet që kërkojnë anëtarësim mund të arrihet duke u mbështetur në shembullin pozitiv të të ashtuquajturit ‘Raporti Priebe’, i cili tashmë ndihmoi në tejkalimin e një krize serioze të demokracisë dhe sundimit të ligjit në Maqedoni në 2015.
Komisioni Evropian sapo ka nisur një nismë të re për raportimin e Priebe për të monitoruar të gjithë sistemin e Sundimit të Ligjit në Bosnje dhe Herzegovinë. Unë inkurajoj Komisionin që të iniciojë një mision të tillë monitorimi edhe në Shqipëri“, tha Basha.
Në vitin 2015, në kulmin krizës politike në Maqedoni (sot Veriore), Brukseli mblodhi një grup ekspertësh të pavarur, të udhëhequr nga ish-drejtori për Ballkanin në Komisionin Europian, Reinhard Priebe për të identifikuar çështjet sistematike të Sundimit të Ligjit.
Hetimi asokohe në vendin fqinj çoi në të ashtuquajturin “Raporti Priebe”. /tesheshi.com/
